បើតាមនាយករដ្ឋមន្ត្រី លោក Kyriakos Mitsotakis បានឲ្យដឹងកាលពីល្ងាចថ្ងៃពុធ (ទី២៣ ខែកក្កដា) ថា ប្រទេសក្រិកបានអញ្ជើញរដ្ឋាភិបាលដែលត្រូវបានទទួលស្គាល់ជាអន្តរជាតិរបស់ប្រទេសលីប៊ី នៅទីក្រុងទ្រីប៉ូលី ដើម្បីចាប់ផ្តើមកិច្ចពិភាក្សា ស្តីពីការកំណត់តំបន់សេដ្ឋកិច្ចផ្តាច់មុខ នៅក្នុងសមុទ្រមេឌីទែរ៉ាណេ។

ចំណាត់ការនេះ មានគោលបំណងកែលម្អទំនាក់ទំនង រវាងប្រទេសជិតខាងទាំង២ ដែលជួបនឹងភាពអាប់អួដោយសារកិច្ចព្រមព្រៀងដែនសមុទ្រដ៏ចម្រូងចម្រាសដែលត្រូវបានចុះហត្ថលេខាក្នុងឆ្នាំ២០១៩ រវាងរដ្ឋាភិបាលលីប៊ី និងទួរគី ជាគូសត្រូវដ៏យូរអង្វែងរបស់ប្រទេសក្រិកដែលបានគូសផែនទីតំបន់សមុទ្រ នៅកៀកនឹងកោះ Crete របស់ក្រិក។

លោក Mitsotakis បានប្រាប់ទូរទស្សន៍ក្នុងស្រុក Skai ថា៖ «យើងសូមអញ្ជើញ ហើយខ្ញុំគិតថា អ្នកប្រហែលជានឹងឃើញវឌ្ឍនភាព ក្នុងតំបន់នេះឆាប់ៗ។ យើងអញ្ជើញរដ្ឋាភិបាលទីក្រុងទ្រីប៉ូលី ដើម្បីពិភាក្សាជាមួយប្រទេសក្រិក អំពីការកំណត់ខ្ពង់រាប និងតំបន់សេដ្ឋកិច្ចផ្តាច់មុខ»។

ប្រទេសក្រិកនៅឆ្នាំនេះ បានចាប់ផ្តើមបើកការកិច្ចប្រឹងប្រែងថ្មីមួយ ដើម្បីអភិវឌ្ឍធនធានអ៊ីដ្រូកាបូនរបស់ខ្លួន នៅម្ដុំកោះ Crete ជាចំណាត់ការដែលលីប៊ីបានជំទាស់ ដោយផ្ដល់ហេតុផលថា ប្លុកមួយចំនួន បានរំលោភលើតំបន់ដែនសមុទ្ររបស់ខ្លួន៕