ទីប្រឹក្សាជាន់ខ្ពស់ផ្នែកសេដ្ឋកិច្ចរបស់រដ្ឋាភិបាល នៅថ្ងៃព្រហស្បតិ៍ (ទី២៤ ខែកក្កដា) នេះ បានបញ្ជាក់ថា ការចរចា អំពីអត្រាពន្ធ ១៩ភាគរយថ្មី ដែលសហរដ្ឋអាមេរិកដាក់លើប្រទេសហ្វីលីពីន គឺ «មិនទាន់បញ្ចប់នៅឡើយទេ» ស្របពេលបង្ហាញពីក្តីបារម្ភ អំពីផលប៉ះពាល់ដែលអាចកើតមានដោយសារកិច្ចព្រមព្រៀងនេះ លើវិស័យកសិកម្មរបស់ប្រទេស។

លោកប្រធានាធិបតី Ferdinand Marcos បានវិលត្រលប់ទៅកាន់ទីក្រុងម៉ានីលវិញ កាលពីល្ងាចថ្ងៃពុធ (ទី២៣ ខែកក្កដា) បន្ទាប់ពីមានដំណើរទស្សនកិច្ចរយៈពេល ៣ថ្ងៃទៅកាន់ទីក្រុងវ៉ាស៊ីនតោន ជាកន្លែងដែលលោកធានាបាននូវការបញ្ចុះអត្រាពន្ធលើទំនិញហ្វីលីពីន ពី ២០ភាគរយ មកត្រឹម ១៩ភាគរយ បន្ទាប់ពីបានជួបជាមួយប្រធានាធិបតីអាមេរិក លោក Donald Trump។ ខណៈពេលដែលអ្នករិះគន់មួយចំនួន បានចោទសួរអំពី សម្បទានមានកម្រិតនោះ លោក Marcos បានទទូចថា វាគឺជា «សមិទ្ធិផលដ៏សំខាន់»។

ទន្ទឹមនឹងនោះដែរ ប្រធានាធិបតីអាមេរិក បានគូសបញ្ជាក់ពី «ការមិនជាប់កាតព្វកិច្ចពន្ធ» សម្រាប់ទំនិញអាមេរិក ដែលនាំចេញទៅកាន់ហ្វីលីពីន ដោយធ្វើឲ្យមានមន្ទិលសង្ស័យកាន់តែខ្លាំងឡើងបន្ថែមទៀត នៅទីក្រុងម៉ានីល ជុំវិញអតុល្យភាពដែលត្រូវបានមើលឃើញយ៉ាងច្បាស់ក្រឡែត។

តែទោះជាយ៉ាងណាក្ដី នៅថ្ងៃព្រហស្បតិ៍ (ទី២៤ ខែកក្កដា) នេះ ទីប្រឹក្សាសេដ្ឋកិច្ចរបស់លោក Marcos គឺលោក Frederick Go បាននិយាយថា មិនមែនពន្ធទាំងអស់ នឹងត្រូវបានលើកលែងនោះទេ ហើយថា ការពិភាក្សាបន្ថែមទៀត កំពុងបន្តប្រព្រឹត្តទៅ។ 

លោកបានប្រាប់អ្នកសារព័ត៌មានថា៖ «ការចរចាមិនទាន់បានបញ្ចប់នៅឡើយទេ។ ក្រុមការងារបច្ចេកទេសរបស់យើង នឹងបន្តធ្វើការជាមួយសមភាគីរបស់ពួកគេ ពីអាមេរិក ដើម្បីបញ្ចប់សេចក្ដីលម្អិតនៃការរៀបចំនេះ។ នៅមានរឿងជាច្រើនដែលត្រូវពិភាក្សា»៕