នៅថ្ងៃព្រហស្បតិ៍នេះ ប្រជាពលរដ្ឋរស់នៅតំបន់ភាគខាងត្បូងប្រទេសស៊ីប បានរៀបរាប់ពីការបំផ្លិចបំផ្លាញ និងការបាត់បង់ទ្រព្យសម្បត្តិផ្ទាល់ខ្លួន ពេលដែលពួកគេវិលត្រឡប់មកកាន់ផ្ទះ និងដីរងការឆាបឆេះរបស់ពួកគេវិញ បន្ទាប់ពីភ្លើងឆេះព្រៃសម្លាប់មនុស្ស ២នាក់ និងបង្ខំឲ្យមនុស្សរាប់រយនាក់ផ្សេងទៀត ជម្លៀសខ្លួន ។

 លោក Kostas Hatzikonstantinou គឺជាអ្នកស្រុកមួយរូបនិយាយថា នៅពេលព្រឹកពួកយើងបានមើលឃើញទំហំនៃមហន្តរាយ ។ វាគឺជាសោកនាកម្មមួយមិនអាចនិយាយបានសម្រាប់អ្នករាល់គ្នា ពួកយើងលែងមានតំបន់ដ៏ស្រស់ស្អាត ដូចដែលពួកយើងធ្លាប់ឃើញជាច្រើនឆ្នាំមកនេះ ទៀតហើយ។

 រថយន្តរងការឆាបឆេះ ដំបូលបាក់ និងព្រះវិហាររោលផ្សែង ត្រូវបានមើលឃើញនៅភូមិ Souni និង Kantou ជាទីដែលឧទ្ធម្ភាគចក្របន្តទម្លាក់ទឹកលើដីកំពុងឆេះ ។

 ភ្លើងឆេះព្រៃដែលបានកើតមានកាលពីថ្ងៃពុធ ពេលដែលសីតុណ្ហភាពកើនឡើងដល់ ៤៤អង្សាសេ បានលេបត្របាក់ដីព្រៃយ៉ាងហោច ១០០គ.មក្រឡា បំផ្លិចបំផ្លាញតំបន់ផលិតស្រាទំពាំងបាយជូ ដែលបានរងផលប៉ះពាល់រួចទៅហើយដោយសារគ្រោះរាំងស្ងួត ។

 ប្រទេសស៊ីប បានអំពាវនាវសុំជំនួយតាមរយៈយន្តហការការពារស៊ីវិលសហភាពអឺរ៉ុប ក្នុងនោះប្រទេសអេស្ប៉ាញ និងហ៊្សកដានី ស្ថិតក្នុងចំណោមប្រទេសផ្តល់ជំនួយ ។ ការវាយតម្លៃពេញលេញពីផលខូចខាត កំពុងបន្ត ៕