នៅខេត្តភាគពាយ័ព្យ Bilecik ប្រទេសទួរគី ភ្លើងឆេះព្រៃបានឆាបឆេះឈានចូលដល់ថ្ងៃទី ៤ ជាប់ៗគ្នា ស្របពេលដែលក្រុមភ្នាក់ងារពន្លត់អគ្គិភ័យ កំពុងព្យាយាមទប់ស្កាត់អណ្តាតភ្លើង និងជម្លៀសមនុស្សចេញពីភូមិជាច្រើន ។

ភ្លើងឆេះព្រៃ ៦កន្លែងដាច់ដោយឡែកពីគ្នា កំពុងឆាបឆេះនៅទូទាំងប្រទេសទួរគីនាថ្ងៃព្រហស្បតិ៍នេះ ហើយរដ្ឋមន្រ្តីក្រសួងកសិកម្ម និងរុក្ខាប្រម៉ាញ់លោក Ibrahim Yumakli បានព្រមានកាលពីថ្ងៃពុធថា ខ្យល់បក់ខ្លាំង អាកាសធាតុក្តៅស្ងួត និងស្ថានភាពអាកាសធាតុផ្សេងទៀត បានធ្វើឲ្យកើតមានហានិភ័យកាន់តែធ្ងន់ធ្ងរនៃភ្លើងឆេះព្រៃបន្ថែមទៀត ។

លោក Yumakli និយាយកាលពីយប់ថ្ងៃពុធថា ក្រុមភ្នាក់ងារពន្លត់អគ្គិភ័យ ១០នាក់ បានស្លាប់ និង ១៤នាក់ផ្សេងទៀត រងរបួស អំឡុងព្យាយាមពន្លត់ភ្លើងឆេះព្រៃនៅខេត្តភាគកណ្តាល Eskisehir ។

អ្នកស្រុកនៅក្នុងភូមិ Selcik ស្ថិតក្នុងស្រុក Osmaneli ខេត្ត Bilecik បានជម្លៀសខ្លួនកាលពីថ្ងៃពុធ ប៉ុន្តែក្រោយមកត្រូវបានអនុញ្ញាតឲ្យវិលត្រឡប់មកកាន់ភូមិវិញ ក្រោយលែងមានការគំរាមកំហែងពីភ្លើងឆេះព្រៃ ។

លោក Cemil Karadag គឺជាអ្នកស្រុកម្នាក់រស់នៅក្នុងភូមិ Osmaneli និយាយថា លោកអាចនិយាយបានថា វាគឺជាភ្លើងឆេះព្រៃធំបំផុតនៅក្នុងប្រវត្តិសាស្រ្តភូមិ Osmaneli ។ ភូមិ Osmaneli ពុំធ្លាប់ដែលមើលឃើញភ្លើងឆេះព្រៃបែបនេះកាលពីមុនមកនោះទេ ។

លោកបន្តថា វាបានហ៊ុមព័ទ្ធភូមិរបស់ពួកយើងពី ៣ជ្រុង ពួកគេមិនអាចអន្តរាគមន៍បាននោះទេ វារីករាលដាលយ៉ាងឆាប់រហ័ស ប៉ុន្តែអរគុណព្រះដែលភូមិរបស់ពួកយើងមិនរងការខូចខាតច្រើន ៕