​ល្បុក្កតោ៖ ភាពយន្ដ​ខ្មែរ​-​កាណាដា «​ការ​រស់​ឡើងវិញនៃ​ក្បាច់គុន​ល្បុក្កតោ ឬ Surviving Bokator» ដែល​ជា​ភាពយន្ដ​បែប​ឯកសារ​កីឡា បាន​បន្ដ​ឈ្នះ​ពានរង្វាន់​ថ្មី​មួយទៀត​ហើយនៅក្នុង​កម្មវិធី BKK DOC (Bangkok) International Documentary Awards 2021 គឺ​ពានរង្វាន់​ឯកសារ​កីឡា​ល្អ​បំផុត។ នេះ​បើតាម​ការបញ្ជាក់​របស់​លោក អ៊ូ តារា អគ្គលេខាធិការរង​សហព័ន្ធ​កីឡា​គុន​ល្បុក្កតោ​កម្ពុជា។​

​លោក អ៊ូ តារា បាន​ឲ្យ​ដឹងថា ភាពយន្ដ Surviving Bokator នេះត្រូវបាន​បញ្ជូន​ចូលរួម​ប្រកួត​ក្នុង​មហោស្រប​ភាពយន្ដ​ឆ្នាំ​២០២១ ក្នុង​កម្មវិធី BKK DOC (Bangkok) International Documentary Awards កាល​ចុងខែ​ធ្នូ ឆ្នាំ​២០២១ កន្លងទៅ ហើយ​បានទទួល​ការគាំទ្រ​ពីទស្សនិក​ជន និង​អ្នកសរសេរ​កម្មវិធីក្នុង​ព្រឹត្តិការណ៍​នេះ រហូត​ទទួលបាន​ពានរង្វាន់​ឯកសារ​កីឡា​ល្អ​បំផុត​តែម្ដង។​ ​គួរ​ដឹងថា ភាពយន្ដ​ឯកសារ​នេះគឺជា​សាច់រឿង​បង្ហាញ​ពី​ការ​រស់​ឡើងវិញនៃ​ក្បាច់គុន​បុរាណ​ខ្មែរគឺ​គុន​ល្បុក្កតោ ដែលមាន​ការចូលរួម​ពី​ព្រឹទ្ធ​ចា​រ្យ​គុន​ល្បុក្កតោ សាន គឹមស៊ាន​, តារាភាពយន្ដ សំ ថា​រ័​ត្ត និង​គ្រូ​ជម្រើសជាតិ​លោក អ៊ឹង ដា​រិ​ទ្ធ និង​កីឡាករ​-​កីឡាការិនី​ជាច្រើនរូប​ទៀត ក្នុងនោះ​ក៏បាន​រំលេច​នូវ​ការ​ដណ្ដើមបាន​មេដាយប្រាក់​ពិភពលោក ក្នុងការ​ប្រកួត​យុទ្ធ​គុន​ចម្រុះនៅ​សាធារណៈរដ្ឋ​កូរ៉េ​ផងដែរ។​ ​ក្រោយ​ចំណាយពេល​ថត​ជាង ៥​ឆ្នាំ ក្រោម​ការដឹកនាំ​របស់​ផលិតករ​ជនជាតិ​កាណាដា​លោក Mark Bochsler ភាពយន្ដ Surviving Bokator បានទទួល​ស្គាល់​ពី​មហោស្រប​ភាពយន្ដ​កីឡា​ដ៏​ចំណាស់​ជាងគេ​លើ​លោកក្នុង​ខែវិច្ឆិកា ឆ្នាំ​២០២០ នៅ​ប្រទេស​អ៊ីតាលី ហើយ​លោក Bochsler បាន​បន្ដ​នាំយក​ភាពយន្ដ​ឯកសារ​កីឡា​ក្បាច់គុន​បុរាណ​ខ្មែរ​នេះ ចូលរួម​ប្រកួតប្រជែង​ក្នុង​កម្មវិធី និង​ម​ហោ​ភាពយន្ដ​អន្ដរជាតិ​ជាច្រើន។​

​លោក អ៊ូ តារា បាន​បញ្ជាក់ថា រហូតមកទល់​ពេលនេះភាពយន្ដ Surviving Bokator បានឈ្នះ​ពានរង្វាន់​ជាង ២០ពានរង្វាន់​ទូទាំង​ពិភព​លោក។ សមិទ្ធផល​នេះត្រូវបាន​សហព័ន្ធ​ចាត់ទុកជា​កិត្តិយស​មួយ សម្រាប់​ភាពយន្ដ​ឯកសារស្ដីពី​ការ​រស់​ឡើងវិញនៃ​ក្បាច់គុន​ល្បុក្កតោ ដែល​បាន​ដើរតួ​យ៉ាងសំខាន់​ក្នុងការ​ពាំនាំ​យក​នូ​វប្រ​ភេទ​កីឡា​អត្តសញ្ញាណ​ជាតិ​មួយ ទៅ​បង្ហាញ​លើ​ឆាក​អន្ដរជាតិបន្ទាប់ពី​ការ​គំរាម​កំ​ហែង​ក្នុងសម័យ​ប៉ុលពតកាលពី​ជាង ៤០​ឆ្នាំមុន។​ ​លោក​ថា បន្ទាប់ពី​ដំណើរ​ផ្សព្វផ្សាយ​ដ៏​ទូលំទូលាយ​នៅក្រៅ​ប្រទេស ភាពយន្ដ Surviving Bokator គ្រោង​នឹង​ត្រលប់មក​កម្ពុជា​វិញឆ្នាំ​២០២២ នេះ ក្រោយ​ជំងឺ​រា​ត​ត្បាល​ជាស​កល​កូ​វីដ​-១៩ ធូរស្រាលដើម្បី​ធ្វើ​ការចាក់​បញ្ចាំង​ផ្សាយ​នៅតាម​រោងកុន​ទូទាំងប្រទេស​។ ចំពោះ​កាលវិភាគ​នៃ​ការចាក់​បញ្ចាំង​នេះគ្រោង​ធ្វើឡើង​ស្របពេល​ជាមួយគ្នា ដែល​ក្បាច់គុន​ល្បុក្កតោ​ត្រូវបាន​ដាក់​ស្នើ​ជា​បេតិកភណ្ឌ​វប្បធម៌​អរូបី របស់​អង្គការ​យូណេស្កូ​នៅ​ឆ្នាំ​២០២២ ផ្ទាល់​តែម្ដង៕

​អត្ថបទ៖ លី ឈុន​ឡា