​សហរដ្ឋអាមេរិក៖ យោងតាម​សារព័ត៌មាន Reuters កាលពី​ថ្ងៃ​ចន្ទសហរដ្ឋអាមេរិក​មាន​ចំនួន​អ្នកជំងឺ COVID-19 ចូល​សម្រាក​ព្យាបាលនៅ​ក្នុង​មន្ទីរពេទ្យ​ខ្ពស់​មិន​ធ្លាប់មាន​ ដោយបាន​បំបែក​កំណត់ត្រា​ផងដែរ​ដែល​កាលពី​ចុងខែ​ធ្នូ ​ឆ្នាំ២០២១ មាន​អ្នកជំងឺ​ចូល​សម្រាក​ព្យាបាល​នៅ​មន្ទីរពេទ្យ​ខ្ពស់បំផុត​ត្រឹម​តែង​ជាង​ ១០​ម៉ឺន​នាក់​ប៉ុណ្ណោះ ខណៈ​ការឆ្លង​បណ្ដាលមកពី​វីរុស​ប​ម្លែ​ង​ខ្លួន​ថ្មី Omicron បាន​ប៉ះពាល់ខ្លាំង​លើ​ប្រព័ន្ធ​សុខភាព​នៅក្នុង​រដ្ឋ​មួយចំនួន​។

​មនុស្ស​ចំនួន​ ១៣២,៦៤៦​នាក់​បាន​ចូល​សម្រាក​ព្យាបាល​នៅ​មន្ទីរពេទ្យ​ដោយសារ​ឆ្លង​ជំងឺ COVID-19 ជា​ចំនួន​ហក់​ឡើង​ខ្ពស់បំផុត​លើស​ពី​ចំនួន ១៣២​,០៥១​នាក់​ដែល​បាន​បង្កើត​កំណត់ត្រា​កាលពី​ខែមករា​ឆ្នាំមុន​។ ​ចំនួន​អ្នកជំងឺ​ចូល​សម្រាក​ព្យាបាល​នៅ​មន្ទីរពេទ្យបាន​កើ​ន​ឡើង​ខ្ពស់​ជា​លំដាប់​ចាប់តាំងពី​ខែធ្នូ​មក ជាការ​កើនឡើង​ទ្វេដងកាលពី ​៣​សប្ដាហ៍​មុន ខណៈ​វីរុស​ប​ម្លែ​ង​ខ្លួន​ថ្មី Omicron ដែលមាន​សមត្ថភាព​ចម្លង​លឿន​ជាង​វីរុស​ប​ម្លែ​ង​ខ្លួន​ថ្មី Delta ក្លាយជា​វីរុស​ឆ្លង​ថ្មី​ដ៏​មាន​ឥទ្ធិពល​នៅក្នុង​សហរដ្ឋអាមេរិក​។​

​យោងតាម​ការវិភាគរ​បស់​សារព័ត៌មាន Reuters នៅ​រដ្ឋ Delaware, Illinois, Maine, Maryland, Missouri, Ohio, Pennsylvania, Puerto Rico, កោះ U.S. Virgin Islands, រដ្ឋ Vermont, Virginia, ទីក្រុង​Washington D.C., និង​រដ្ឋ Wisconsin បាន​រាយការណ៍​ចំនួន​អ្នកជំងឺ COVID-19 ចូល​សម្រាក​ព្យាបាល​នៅ​មន្ទីរពេទ្យ​ដល់​កម្រិត​ខ្ពស់បំផុតនាពេល​ថ្មីៗ​នេះ​។ ​យោងតាម​សារព័ត៌មាន world ometer គិត​ត្រឹម​ព្រឹក​ថ្ងៃ​អង្គារ​នេះ សហរដ្ឋអាមេរិកមាន​ករណី​ឆ្លង​វីរុស COVID-19 ​សរុប​ចំនួន ៦២,៥៣០,៥៤៥​នាក់បន្ទាប់ពី​មាន​ករណី​ឆ្លង​ថ្មី ៦៣០​,៨០៦​នាក់ និង​ស្លាប់​សរុប ៨៦១​,២៧៧​នាក់បន្ទាប់ពី​មានការ​ស្លាប់​ថ្មី​ចំនួន ៩៥៤​នាក់​៕

អត្ថបទ៖ សុខមាន