ប្រធានាធិបតី លោក Emmanuel Macron បាននិយាយកាលពីថ្ងៃព្រហស្បតិ៍ ទី២៤ ខែកក្កដា ថា ប្រទេសបារាំងនឹងទទួលស្គាល់រដ្ឋប៉ាឡេស្ទីននៅក្នុងខែកញ្ញា នៅក្នុងមហាសន្និបាតអង្គការសហប្រជាជាតិ ជាចំណាត់ការមួយក្នុងគោលបំណងធ្វើឲ្យរស់ឡើងវិញសម្រាប់ដំណោះស្រាយរដ្ឋពីរ ប៉ុន្តែជាចំណាត់ការដែលធ្វើឲ្យមានការថ្កោលទោសភ្លាមៗពីសំណាក់អ៊ីស្រាអែល។

នៅក្នុងលិខិតមួយផ្ញើទៅកាន់ប្រធានអាជ្ញាធរប៉ាឡេស្ទីន លោក Mahmoud Abbas និងបានបង្ហោះនៅលើបណ្តាញផ្សព្វផ្សាយសង្គម លោក Macron បានបញ្ជាក់ពីការសម្រេចចិត្តរបស់ប្រទេសបារាំង និងបាននិយាយថា ខ្លួននឹងជំរុញទឹកចិត្តដល់អ្នកផ្សេងទៀតឱ្យធ្វើតាម។ លោក Macron និយាយថា «ជាការពិតចំពោះការប្តេជ្ញាចិត្តជាប្រវត្តិសាស្ត្ររបស់ខ្លួនសម្រាប់សន្តិភាពដ៏ត្រឹមត្រូវនិងយូរអង្វែងនៅមជ្ឈិមបូព៌ា ខ្ញុំបានសម្រេចថា ប្រទេសបារាំងនឹងទទួលស្គាល់រដ្ឋប៉ាឡេស្ទីន»។ «ខ្ញុំនឹងធ្វើសេចក្តីប្រកាសនេះនៅឯមហាសន្និបាតអង្គការសហប្រជាជាតិនៅខែកញ្ញាខាងមុខ»។ ប្រទេសបារាំង នឹងក្លាយជាប្រទេសលោកខាងលិចដ៏សំខាន់ដំបូងគេដែលទទួលស្គាល់ជាផ្លូវការនូវរដ្ឋប៉ាឡេស្ទីន។

រដ្ឋមន្ត្រីការបរទេសសហរដ្ឋអាមេរិក លោក Marco Rubio បាននិយាយថា ទីក្រុងវ៉ាស៊ីនតោន ច្រានចោលផែនការរបស់ប្រធានាធិបតីបារាំងលោក Emmanuel Macron ដើម្បីទទួលស្គាល់រដ្ឋប៉ាឡេស្ទីន ដោយអ្នកជាន់ខ្ពស់អាមេរិករូបនេះបានចាត់ទុកថាជា«ការសម្រេចចិត្តឥតគិត» ។ ការប្រកាសនេះបានជួបប្រទះទៅនឹងការដាក់កំហុសយ៉ាងខ្លាំងពីមេដឹកនាំអ៊ីស្រាអែល។ ការប្រកាសនេះបានជួបប្រទះទៅនឹងការដាក់កំហុសយ៉ាងខ្លាំងពីមេដឹកនាំអ៊ីស្រាអែល។

រដ្ឋមន្ត្រីការពារជាតិអ៊ីស្រាអែលលោក Israel Katz បានពណ៌នាចំណាត់ការនេះថាជា «ការអាម៉ាស់ និងជាការចុះចាញ់អំពើភេរវកម្ម» និងបាននិយាយថា អ៊ីស្រាអែលនឹងមិនអនុញ្ញាតឱ្យមានការបង្កើតអង្គភាពប៉ាឡេស្ទីនដែលគំរាមកំហែងដល់សន្តិសុខរបស់ខ្លួនឡើយ។