បេសកជនពិសេសរបស់សហរដ្ឋអាមេរិក លោក Steve Witkoff បាននិយាយថា លោកកំពុងកាត់បន្ថយកិច្ចពិភាក្សាក្នុងគោលបំណងឈានដល់បទឈប់បាញ់ក្នុងសង្គ្រាមរបស់អ៊ីស្រាអែលលើតំបន់ហ្កាហ្សា បន្ទាប់ពីសំណើចុងក្រោយពីក្រុមហាម៉ាស បានបង្ហាញពីការខ្វះខាតនៃបំណងប្រាថ្នាដើម្បីឈានដល់បទឈប់បាញ់ ។

លោក Witkoff បានធ្វើសេចក្តីប្រកាសក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ ត្រឹមតែប៉ុន្មានម៉ោងបន្ទាប់ពីការិយាល័យរបស់នាយករដ្ឋមន្ត្រី Benjamin Netanyahu បាននិយាយថា អ៊ីស្រាអែលក៏បានហៅក្រុមចរចារបស់ខ្លួនវិលត្រឡប់ពីប្រទេសកាតាផងដែរ ស្របពេលមានការចលាចលផ្នែកការទូតចុងក្រោយ។

ក្រុមហាម៉ាស បាននិយាយក្នុងសេចក្តីថ្លែងការណ៍មួយដែលបានចេញផ្សាយកាលពីយប់ថ្ងៃព្រហស្បតិ៍ថា ចលនានេះបញ្ជាក់ពីភាពខ្នះខ្នែងរបស់ខ្លួនក្នុងការបន្តការចរចា និងចូលរួមជម្នះឧបសគ្គ និងនាំទៅរកកិច្ចព្រមព្រៀងបទឈប់បាញ់ជាអចិន្ត្រៃយ៍ ។

នៅព្រឹកថ្ងៃដដែល ក្រុមហាម៉ាស បានបញ្ជូនការឆ្លើយតបចុងក្រោយរបស់ខ្លួនចំពោះក្របខ័ណ្ឌបទឈប់បាញ់ទៅកាន់ក្រុមអ្នកសម្រសម្រួលកាតា អេហ្ស៊ីប និងសហរដ្ឋអាមេរិក។ ការិយាល័យរបស់លោក Netanyahu បានបញ្ជាក់ពីការទទួលបានការឆ្លើយតប ហើយបាននិយាយថាខ្លួនកំពុងស្ថិតក្រោមការត្រួតពិនិត្យឡើងវិញ។ ភាគីទាំងពីរមិនបានបញ្ចេញខ្លឹមសារនោះទេ។

យ៉ាងហោចណាស់មនុស្ស១១៥នាក់បានស្លាប់ដោយសារកង្វះអាហារូបត្ថម្ភចាប់តាំងពីអ៊ីស្រាអែលបានចាប់ផ្តើមសង្រ្គាមរបស់ខ្លួនលើតំបន់ហ្កាហ្សាក្នុងខែតុលាឆ្នាំ២០២៣ ដែលភាគច្រើននៅក្នុងប៉ុន្មានសប្តាហ៍ថ្មីៗនេះ ខណៈ អង្គការសហប្រជាជាតិ និងទីភ្នាក់ងារជំនួយបានព្រមានថាអ្នកស្រុកនៅតំបន់ហ្កាហ្សាកំពុងប្រឈមនឹងការអត់ឃ្លានយ៉ាងធ្ងន់ធ្ងរ៕