វិមានក្រឹមឡាំងបាននិយាយថា កងកម្លាំងរុស្ស៊ី កំពុងជំរុញប្រតិបត្តិការបង្កើត "តំបន់ទ្រនាប់" នៅតាមបណ្តោយព្រំដែនជាមួយអ៊ុយក្រែន ខណៈការប្រយុទ្ធគ្នាកាន់តែក្តៅគគុក បន្ទាប់ពីការចរចាសន្តិភាពជុំទី៣ ដែលបានបរាជ័យម្តងទៀតក្នុងការទទួលបានវឌ្ឍនភាពណាមួយឆ្ពោះទៅរកបទឈប់បាញ់ នៅក្នុងឆ្នាំទី៤ នៃសង្រ្គាមដ៏បង្ហូរឈាម។

អ្នកនាំពាក្យវិមានក្រឹមឡាំង លោក Dmitry Peskov បានធ្វើអត្ថាធិប្បាយបែបនេះក្នុងអំឡុងសន្និសីទខ្លីមួយកាលពីថ្ងៃព្រហស្បតិ៍ (២៤ កក្កដា) ដោយបង្ហាញសញ្ញាថា រុស្ស៊ីមិនមានចេតនាក្នុងការបន្ថយសង្គ្រាមរបស់ខ្លួនលើអ៊ុយក្រែននោះទេ បន្ទាប់ពីកិច្ចប្រជុំសន្តិភាពខ្លីមួយកាលពីថ្ងៃពុធសប្ដាហ៍នេះ រវាងគណៈប្រតិភូនៅទីក្រុងអ៊ីស្តង់ប៊ុល ដែលមានរយៈពេលត្រឹមតែ ៤០នាទីប៉ុណ្ណោះ។

អ្នកចរចានៅទួរគី បានពិភាក្សាពីការដោះដូរឈ្លើយសឹកបន្ថែម ប៉ុន្តែនៅតែឆ្ងាយដាច់ពីគ្នាលើបទឈប់បាញ់ និងកិច្ចប្រជុំទល់មុខគ្នា ដែលបានស្នើឡើងរវាងប្រធានាធិបតីរុស្ស៊ី លោក Vladimir Putin និងសមភាគីអ៊ុយក្រែន លោក Volodymyr Zelenskiy។

អតីតប្រធានាធិបតីរុស្ស៊ី លោក Dmitry Medvedev ដែលជាសម្ព័ន្ធមិត្តដ៏ជិតស្និទ្ធបំផុតរបស់មេដឹកនាំវិមានក្រឹមឡាំងបច្ចុប្បន្ន គឺលោក Putin និងក្រុមមន្ត្រីរុស្ស៊ីផ្សេងទៀត បានអំពាវនាវម្តងហើយម្តងទៀតឱ្យបង្កើតតំបន់ទ្រនាប់នៅភាគខាងជើងអ៊ុយក្រែន ដើម្បីដាក់គម្លាតទីក្រុងរុស្ស៊ី ចេញពីជួរមុខនៃប្រព័ន្ធសព្វាវុធវាយប្រហាររយៈចម្ងាយឆ្ងាយ ដែលលោកខាងលិច ផ្ដល់ឱ្យអ៊ុយក្រែន។

លោក Putin ផ្ទាល់ក៏បាននិយាយកាលពីខែឧសភាថា រុស្ស៊ីកំពុងបង្កើតតំបន់ទ្រនាប់មួយដើម្បីការពារតំបន់ព្រំដែនរបស់ខ្លួន ជាពិសេសទីក្រុង Belgorod ដែលនៅជាប់នឹងទីក្រុង Kharkiv ពីការវាយប្រហាររបស់អ៊ុយក្រែន៕