ផែនការរបស់លោកប្រធានាធិបតីអាមេរិក Donald Trump ក្នុងការដំឡើងពន្ធ ៥០% ថ្មីលើផលិតផលទាំងអស់របស់ប្រេស៊ីល ចាប់ពីថ្ងៃទី០១ ខែសីហា ខាងមុខ អាចបង្កការបំផ្លិចបំផ្លាញដល់ប្រព័ន្ធដំណាំក្រូចរបស់ប្រទេសអាមេរិកខាងត្បូងមួយនេះ ខណៈរោងចក្រនានាកាត់បន្ថយផលិតកម្ម ហើយកសិករដំណាំក្រូច គិតចង់ទុកផ្លែឈើរបស់ពួកគេឱ្យរលួយចោល ស្របពេលតម្លៃធ្លាក់ចុះយ៉ាងគំហុក។

ពន្ធថ្មីរបស់អាមេរិក នឹងរាំងខ្ទប់ផ្លែឈើប្រេស៊ីលមិនឱ្យចូលទៅក្នុងទឹកដីសហរដ្ឋអាមេរិក ដែលជាអ្នកទិញ ៤២% នៃភេសជ្ជៈទឹកក្រូច ដែលនាំចេញពីប្រេស៊ីល ខណៈពាណិជ្ជកម្មបែបនេះមានតម្លៃប្រហែល ១,៣១ពាន់លានដុល្លារ នៅក្នុងរដូវកាលដែលទើបបញ្ចប់កាលពីខែមិថុនា ឆ្នាំមុន។

យោងតាមសន្ទស្សន៍តាមដានតម្លៃ Cepea យ៉ាងទូលំទូលាយពីសាកលវិទ្យាល័យ Sao Paulo របស់ប្រេស៊ីល បានឱ្យដឹងថា ក្នុងខែនេះ តម្លៃក្រូចនៅប្រេស៊ីល បានធ្លាក់ចុះមកនៅត្រឹម ៤៤រ៉េអាល់ ពោលគឺ ៨ដុល្លារអាមេរិក ក្នុងមួយប្រអប់ ដែលចុះជិតពាក់កណ្តាលនៃតម្លៃកាលពីមួយឆ្នាំមុន ដោយបង្ហាញថា គោលនយោបាយពាណិជ្ជកម្មដ៏គួរឱ្យរំខានរបស់លោក Trump អាចសាបព្រួសភាពវឹកវរ សូម្បីតែមិនទាន់អនុម័តផ្លូវការក៏ដោយ។

អ្នកជំនាញព្រមានថា អ្នកប្រើប្រាស់នៅសហរដ្ឋអាមេរិក ក៏នឹងទទួលផលលំបាករួមជាមួយកសិករប្រេស៊ីលផងដែរ។ ទិន្នន័យបង្ហាញថា ចំនួនពាក់កណ្តាលនៃផលិតផលទឹកក្រូចដែលជនជាតិអាមេរិកផឹក គឺមកពីប្រេស៊ីល ក្រោមម៉ាកយីហោផ្សេងៗជាច្រើន ខណៈប្រេស៊ីលជាប្រទេសផលិតទឹកក្រូចដល់ទៅ ៨០% របស់ពិភពលោក៕