​បាល់ទាត់៖ ​ខ្សែប្រយុទ្ធ Liverpool, Sadio Mane បាន​ជួយ​ក្រុម​ជំរើសជាតិ​សេ​ណេ​ហ្កា​ល់​ដណ្ដើម​បាន​ ៣ពិន្ទុ​នៅ​ការប្រកួត​ដំបូង​ក្នុង​ពូ​ល B នៃ​ព្រឹត្តិការណ៍​បាល់ទាត់​ទ្វីបអាហ្វ្រិក Africa Cup of Nations ក្រោយ​យកឈ្នះ​ហ្ស៊ី​ម​បាប​វ៉េ​។ ​​ហ្ស៊ី​ម​បាប​វ៉េសំណាង​មិនល្អ​នៅ​ចុង​ម៉ោង​ទៅហើយ​នៅពេល​កំហុស​នៅក្នុង​តំបន់​គ្រោះថ្នាក់ធ្វើឱ្យ​ខ្សែប្រយុទ្ធ Liverpool, Sadio Mane ជា​អ្នក​ស៊ុត​សំរេច​គ្រាប់​បាល់​ជ័យជំនះ​នៅ​នាទី​ទី៩០+៧​។

​​ប្រកួត​នេះ​សេ​ណេ​ហ្កា​ល់អ​វត្តមាន​កីឡាករ​ច្រើន​ដោយសារ​ឆ្លង Covid-19 ពោលគឺ​កីឡាករ​ក្នុង​ក្រុម​មានតែ ១៧នាក់​ប៉ុណ្ណោះក្រៅពីនោះ ១១នាក់​ផ្សេងទៀត​មាន​របួស និង​ឆ្លង Covid-19​។ ​​សេ​ណេ​ហ្កា​ល់កំ​ពុង​ស្វែង​រកពាន Africa Cup of Nations ជា​លើកដំបូង​ក្នុង​ប្រវត្តិសាស្ត្រ​ បន្ទាប់ពី​ចុងក្រោយ​បំផុត​បាន​ត្រឹម​ជើងឯក​រង​កាលពី​ឆ្នាំ២០១៩ ចាញ់​អាល់​ហ្សេ​រី​នៅ​វគ្គ​ផ្តាច់ព្រ័ត្រ​។ ​​ក្នុង​ពូ​ល​នេះដែរ​ហ្គី​ណេ​យកឈ្នះ​ម៉ាឡាវី ១-០ ដូចគ្នា​ដើម្បី​ឈរ​លេខ ១ ក្នុង​ពូ​ល B ជាមួយ​សេ​ណេ​ហ្កា​ល់​។

​​ងាក​មក​ការប្រកួត​នៅក្នុង​ពូ​ល C ក្រុម​ជើងឯក ៤សម័យ​ហ្កា​ណា​ចាប់ផ្តើម​មិនបាន​ល្អ​ឡើយ​ក្រោយ​ចាញ់​ម៉ា​រ៉ុ​ក ១-០ ប្រកួត​ដំបូង​ក្នុង​ពូ​ល​។ ​​មួយ​គ្រាប់​ជ័យជំនះ​របស់​ម៉ា​រ៉ុ​ក​សំរេចបាន​នៅ​នាទី​ទី៨៣ ដោយ​ខ្សែប្រយុទ្ធ​ក្លិប​បារាំង Angers, Sofiane Boufal​។ ​នៅក្នុង​ពូ​ល​នេះដែរ​ហ្កា​បុក​ក៏​យកឈ្នះ ១-០ ផងដែរ​លើ​កូ​ម៉ូ​រ៉ូ​ស​ដើម្បី​ទទួលបាន ៣​ពិន្ទុ​ជាមួយ​ម៉ា​រ៉ុ​ក​៕

​អត្ថបទ​៖​នាង សុភា​វុ​ធ