ប្រភពពីមន្ទីរពេទ្យបានប្រាប់សារព័ត៌មាន Al Jazeera មនុស្សរាប់សិបនាក់ត្រូវបានសម្លាប់ រួមទាំងអ្នកកំពុងស្វែងរកជំនួយ ក្នុងការវាយប្រហារដែលកំពុងបន្តឥតឈប់ឈររបស់អ៊ីស្រាអែល នៅទូទាំងតំបន់ហ្កាហ្សា កាលពីថ្ងៃព្រហស្បតិ៍ (២៤ កក្កដា) ហើយមនុស្សយ៉ាងតិច ២នាក់ បានស្លាប់បន្ថែមទៀតដោយសារកង្វះអាហារូបត្ថម្ភធ្ងន់ធ្ងរ ស្របពេលមានកំហឹងជាអន្តរជាតិ កាន់តែខ្លាំងឡើងចំពោះការប្រព្រឹត្តរបស់អ៊ីស្រាអែលនៅក្នុងសង្គ្រាម។

ក្រសួងសុខាភិបាលនៃតំបន់ហ្កាហ្សា បាននិយាយនៅថ្ងៃព្រហស្បតិ៍ដដែលនេះថា គិតមកទល់ពេលនោះ យ៉ាងហោចណាស់មានជនជាតិប៉ាឡេស្ទីនចំនួន ១១៥នាក់ បានស្រេកឃ្លានដល់ស្លាប់ នៅក្នុងតំបន់ហ្កាហ្សា ចាប់តាំងពីអ៊ីស្រាអែល ចាប់ផ្តើមសង្រ្គាមលើតំបន់ប៉ាឡេស្ទីននេះក្នុងខែតុលា ឆ្នាំ២០២៣មក ហើយការស្លាប់ភាគច្រើន ដែលមានកុមារជាច្រើននាក់ កើតមាននៅប៉ុន្មានសប្តាហ៍ថ្មីៗនេះ។

ក្នុងសេចក្តីថ្លែងការណ៍មួយនៅថ្ងៃព្រហស្បតិ៍ ទីភ្នាក់ងារអង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) ព្រមានថា "ក្រុមគ្រួសារហ្កាហ្សាកំពុងទាល់ច្រក" ស្របពេលមានវិបត្តិអត់ឃ្លាន។ ទីភ្នាក់ងារមនុស្សធម៌របស់អង្គការសហប្រជាជាតិ OCHA បានបន្ថែមថា អ៊ីស្រាអែលបាននិងកំពុងរារាំងខ្លួនមិនឱ្យផ្ទៀងផ្ទាត់ជំនួយ ដែលរង់ចាំនៅមជ្ឈមណ្ឌលចែកចាយ។

អ៊ីស្រាអែលបានដាក់ការបិទផ្លូវទាំងស្រុងលើតំបន់ហ្កាហ្សាក្នុងខែមីនា ហើយបានអនុញ្ញាតឱ្យមានជំនួយតិចតួចណាស់ចូលក្នុងទឹកដីនេះតាំងពីចុងខែឧសភាមក ដែលបង្កឱ្យមានវិបត្តិមនុស្សធម៌ធ្ងន់ធ្ងរ និងការព្រមានពីភាពអត់ឃ្លានដ៏ច្រើនលើសលប់៕