លោក John Healey រដ្ឋមន្ត្រីក្រសួងការពារជាតិចក្រភអង់គ្លេស បាននិយាយនៅថ្ងៃសុក្រ (២៥ កក្កដា) នេះថា ការប្តេជ្ញាចិត្តរបស់អង់គ្លេសចំពោះអូស្ត្រាលីគឺមានភាព "ម៉ឺងម៉ាត់ដាច់ខាត" ខណៈរដ្ឋមន្ត្រីការពារជាតិ និងការបរទេសរបស់ប្រទេសទាំងពីរ បានជួបពិភាក្សានៅទីក្រុងស៊ីដនី ស្តីពីការជំរុញកិច្ចសហប្រតិបត្តិការ រួមទាំងការប្តេជ្ញាចិត្តកាន់តែស៊ីជម្រៅចំពោះភាពជាដៃគូនាវាមុជទឹកនុយក្លេអ៊ែរ AUKUS ។

លោក Healey និងប្រមុខការបរទេសអង់គ្លេស David Lammy បានជួបជាមួយនាយករដ្ឋមន្រ្តីអូស្រ្តាលី លោក Anthony Albanese នៅទីក្រុងស៊ីដនី មុនពេលកិច្ចពិភាក្សាផ្តោតលើការជំរុញទំនាក់ទំនងពាណិជ្ជកម្ម និងពន្លឿនភាពជាដៃគូរបស់ AUKUS សម្រាប់ចក្រភពអង់គ្លេស និងអូស្ត្រាលី ក្នុងការកសាងនាវាមុជទឹកដើរដោយថាមពលនុយក្លេអ៊ែរប្រភេទថ្មី។

លោក Healey បាននិយាយនៅថ្ងៃសុក្រដដែលនេះថា AUKUS គឺជាដៃគូការពារជាតិដ៏សំខាន់បំផុតមួយរបស់ចក្រភពអង់គ្លេស ហើយសន្ធិសញ្ញាដែលត្រូវចុះហត្ថលេខាជាមួយអូស្ត្រាលីថ្មី បញ្ជាក់ពីការប្តេជ្ញាចិត្តរបស់អង់គ្លេស សម្រាប់រយៈពេលពាក់កណ្តាលសតវត្សបន្ទាប់។

យោងតាមក្រសួងការពារជាតិអង់គ្លេសបានឱ្យដឹងថា សន្ធិសញ្ញាថ្មីរបស់អង់គ្លេស-អូស្ត្រាលី នឹងគាំទ្រកម្មវិធីនាវាមុជទឹករបស់ប្រទេសនីមួយៗសម្រាប់រយៈពេល ៥០ឆ្នាំ បង្កើតការងាររាប់ម៉ឺនកន្លែង ហើយត្រូវបានរំពឹងថានឹងមានតម្លៃរហូតដល់ ២០ពាន់លានផោន (២៧ ពាន់លានដុល្លារអាមេរិក) ដល់ចក្រភពអង់គ្លេស ក្នុងការនាំចេញក្នុងរយៈពេល ២៥ឆ្នាំខាងមុខ៕