ឯកអគ្គរដ្ឋទូតចិនប្រចាំអង្គការសហប្រជាជាតិ លោក Fu Cong បានអំពាវនាវឱ្យមានការបន្ធូរបន្ថយ និងភាពអត់ធ្មត់ក្នុងជម្លោះរវាងប្រទេសថៃ និងកម្ពុជា ហើយបានបញ្ជាក់ថា ទីក្រុងប៉េកាំង កំពុងដើរតួនាទីជា "អ្នកសម្រុះសម្រួល" បន្ទាប់ពីមានការប៉ះទង្គិចនៅតាមព្រំដែនដែលបង្កឡើងដោយភាគីថៃ កាលពីថ្ងៃព្រហស្បតិ៍សប្ដាហ៍នេះ។

លោក Fu បន្តថា ចិន កំពុងចូលរួមយ៉ាងសកម្មជាមួយសមាជិកក្រុមប្រឹក្សាសន្តិសុខអង្គការសហប្រជាជាតិ (UNSC) និងភាគីពាក់ព័ន្ធក្នុងតំបន់ ដោយសម្តែងក្ដីបារម្ភយ៉ាងខ្លាំងចំពោះស្ថានភាពនេះ។ លោកបន្ថែមថា រដ្ឋាភិបាលចិនបានលើកទឹកចិត្តភាគីទាំងពីរឱ្យអត់ធ្មត់ និងសម្តែងក្តីសង្ឃឹមថា សន្តិភាពនិងស្ថិរភាពអាចនឹងត្រូវបានស្តារឡើងវិញក្នុងពេលឆាប់ៗ។

ថ្លែងក្នុងកិច្ចសម្ភាសន៍ដែលចាក់ផ្សាយដោយប្រព័ន្ធផ្សព្វផ្សាយរដ្ឋ CCTV នៅថ្ងៃសុក្រ (២៥ កក្កដា) នេះ លោក Fu បានសង្កត់ធ្ងន់ថា "កម្ពុជា និងថៃ មិនត្រឹមតែជាអ្នកជិតខាងដ៏ល្អរបស់ចិនប៉ុណ្ណោះទេ ប៉ុន្តែក៏ជាអ្នកជិតល្អនឹងគ្នាផងដែរ ហើយជាសមាជិកដ៏សំខាន់នៃសមាគមន៍ប្រជាជាតិអាស៊ីអាគ្នេយ៍ ហៅកាត់ថា អាស៊ាន"។

លោក Liu Zongyi សមាជិក និងនាយកនៃមជ្ឈមណ្ឌលសិក្សាអាស៊ីខាងត្បូង នៅវិទ្យាស្ថានសៀងហៃ បាននិយាយថា ភាពតានតឹងនេះទំនងជានៅតែអាចគ្រប់គ្រងបាន ដោយសារតែចិន និងអាស៊ាន ឱ្យតម្លៃទៅលើសន្តិភាព និងស្ថេរភាពក្នុងតំបន់៕