ប្រទេសអូម៉ង់ និងអ៊ីរ៉ង់កាលពីថ្ងៃព្រហស្បតិ៍ បានថ្កោលទោសរៀងៗខ្លួនចំពោះការអនុម័តរបស់សភាអ៊ីស្រាអែលលើញត្តិមួយដែលអំពាវនាវឲ្យដាក់អ្វីដែលគេហៅថា«អធិបតេយ្យភាពរបស់អ៊ីស្រាអែល»លើតំបន់ វេសបែង(West Bank)។

ក្រសួងការបរទេសអូម៉ង់ បាននិយាយនៅក្នុងសេចក្តីថ្លែងការណ៍មួយថា ការសម្រេចរបស់អ៊ីស្រាអែល គឺជា «ការប្រឆាំងច្បាប់អន្តរជាតិ និងសេចក្តីសម្រេចរបស់សហគមន៍អន្តរជាតិ» ដែលនឹងធ្វើឲ្យខូចដល់កិច្ចខិតខំប្រឹងប្រែងសន្តិភាព នៅមជ្ឈិមបូព៌ា សិទ្ធិសម្រេចដោយខ្លួនឯងរបស់ប្រជាជនប៉ាឡេស្ទីន និងលទ្ធភាព នៃដំណោះស្រាយរដ្ឋពីរ។

ក្រសួងបានបញ្ជាក់ឡើងវិញនូវ «ការច្រានចោលយ៉ាងដាច់អហង្ការ»របស់អូម៉ង់ចំពោះគោលនយោបាយដែលកំពុងបន្តរបស់អ៊ីស្រាអែល ក្នុងការទប់ស្កាត់ និងការបង្អត់អាហារ ក៏ដូចជាការរាំងខ្ទប់ស្បៀងអាហារ ការផ្គត់ផ្គង់សម្ភារៈវេជ្ជសាស្រ្ត និងជំនួយមនុស្សធម៌ មិនឲ្យទៅដល់ជនស៊ីវិលនៅតំបន់ហ្កាហ្សា និងដែនដីប៉ាឡេស្ទីនផ្សេងទៀត។

ក្រសួងក៏បានឲ្យអ៊ីស្រាអែល និងអ្នកគាំទ្ររបស់ខ្លួន «ទទួលខុសត្រូវទាំងស្រុងចំពោះផលវិបាកផ្នែកច្បាប់ មនុស្សធម៌ និងនយោបាយនៃការអនុវត្តទាំងអស់នេះ» ដោយសង្កត់ធ្ងន់ថា សកម្មភាពបែបនេះ គឺជាការរំលោភបំពានយ៉ាងធ្ងន់ធ្ងរលើច្បាប់មនុស្សធម៌អន្តរជាតិ។

នៅក្នុងសេចក្តីថ្លែងការណ៍ដាច់ដោយឡែកមួយ ក្រសួងការបរទេសអ៊ីរ៉ង់ បាននិយាយថា ខ្លួនបានចាត់ទុកចំណាត់ការរបស់ស្ថាប័ននីតិប្បញ្ញត្តិរបស់អ៊ីស្រាអែលថា ជាភ័ស្តុតាងមួយផ្សេងទៀតនៃលក្ខណៈវាតទីនិយម និងការប្រើប្រាស់អំណាចរបស់អ៊ីស្រាអែល។