យោធាអ៊ីស្រាអែល បាននិយាយថា ទាហាន ៨នាក់ បានរងរបួស កាលពីថ្ងៃព្រហស្បតិ៍ នៅពេលដែលអ្នកបើកបរម្នាក់ បានបើករថយន្តរបស់ខ្លួនដោយចេតនា បុកចូលទៅក្នុងចំណតរថយន្តក្រុង ជាអ្វីដែលនគរបាលហៅថា ជា«ការវាយប្រហារភេរវកម្ម» ។

កងទ័ពបាននិយាយថា ទាហានពីរនាក់ បាន «រងរបួសមធ្យម» និង ៦នាក់ «របួសស្រាល នៅក្នុងការវាយប្រហារ នៅឯផ្លូវប្រសព្វ Beit Lid នៅជិតទីក្រុង Kfar Yona នៅកណ្តាលប្រទេសអ៊ីស្រាអែល។

កងទ័ពបាននិយាយនៅក្នុងសេចក្តីថ្លែងការណ៍មួយថា៖«ទាហានត្រូវបានជម្លៀសទៅកាន់មន្ទីរពេទ្យ ដើម្បីទទួលការព្យាបាល ហើយក្រុមគ្រួសាររបស់ពួកគេ ត្រូវបានជូនដំណឹងឲ្យដឹង»។

មានការផ្ទុះឡើងនៃអំពើហិង្សា នៅក្នុងប្រទេសអ៊ីស្រាអែល និងតំបន់វេសបែង( West Bank) ចាប់តាំងពីការចាប់ផ្តើមនៃសង្រ្គាមប្រឆាំងនឹងក្រុមហាម៉ាសនៅតំបន់ហ្កាហ្សា ដែលបង្កឡើងដោយការវាយប្រហាររបស់ក្រុមសកម្មប្រយុទ្ធប៉ាឡេស្ទីន កាលពីថ្ងៃទី ០៧ ខែតុលា ឆ្នាំ ២០២៣។

ក្មេងជំទង់ម្នាក់ បានស្លាប់ នៅក្នុងខែមីនា ឆ្នាំនេះ នៅពេលដែលនគរបាល បាននិយាយថា រថយន្តដែលបើកបរដោយបុរសជនជាតិប៉ាឡេស្ទីនម្នាក់ បានបើកបុកជនស៊ីវិលដោយចេតនា នៅឯចំណតរថយន្តក្រុងមួយ នៅភាគខាងជើងប្រទេសអ៊ីស្រាអែល។