ក្រសួងឧស្សាហកម្មទីក្រុងសេអ៊ូល បាននិយាយថា កូរ៉េខាងត្បូង និងសហរដ្ឋអាមេរិក បានបញ្ជាក់ជាថ្មីនូវការប្តេជ្ញាចិត្តរបស់ភាគីទាំងពីរក្នុងការបន្តសម្រេចកិច្ចព្រមព្រៀងពាណិជ្ជកម្មដែលមានអត្ថប្រយោជន៍ទៅវិញទៅមក ឱ្យបានមុនថ្ងៃផុតកំណត់ទី០១ ខែសីហា ខាងមុខនេះ នៅពេលដែលពន្ធនាំចូល ២៥% លើទំនិញកូរ៉េខាងត្បូង ត្រូវចូលជាធរមាន។

រដ្ឋមន្ត្រីក្រសួងពាណិជ្ជកម្មអាមេរិក លោក Howard Lutnick និងរដ្ឋមន្ត្រីឧស្សាហកម្មកូរ៉េខាងត្បូង លោក Kim Jung-kwan បានពិភាក្សាពីពន្ធលើវិស័យសេដ្ឋកិច្ច និងបដិការ នៅថ្ងៃព្រហស្បតិ៍ (២៤ កក្កដា) ដោយលោក Kim បានសង្កត់ធ្ងន់លើតម្រូវការក្នុងការបន្ធូរបន្ថយរបាំងពាណិជ្ជកម្ម នេះបើយោងតាមសេចក្តីថ្លែងការណ៍របស់ក្រសួងពាណិជ្ជកម្ម ឧស្សាហកម្ម និងថាមពលកូរ៉េខាងត្បូង។

កិច្ចប្រជុំនេះធ្វើឡើងបន្ទាប់ពីអាមេរិក លុបចោលកិច្ចសន្ទនា "២បូក២" ដែលគ្រោងធ្វើនៅថ្ងៃ២៥ ខែកក្កដា រវាងមន្ត្រីហិរញ្ញវត្ថុ និងពាណិជ្ជកម្មជាន់ខ្ពស់នៃប្រទេសទាំងពីរ រួមទាំងរដ្ឋមន្ត្រីក្រសួងរតនាគារ លោក Scott Bessent ផងដែរ។ កូរ៉េខាងត្បូងចាត់ទុកផែនការកិច្ចប្រជុំដែលត្រូវផ្អាកនេះ ថាជាឱកាសដ៏សំខាន់មួយដើម្បីជំរុញការចរចាពាណិជ្ជកម្ម និងទប់ស្កាត់ពន្ធគយមិនឱ្យឡើងដល់ ២៥% ដែលលោកប្រធានាធិបតីអាមេរិក Donald Trump បានគំរាម។

ក្នុងប៉ុន្មានសប្តាហ៍ថ្មីៗនេះ ទីក្រុងសេអ៊ូលបាននឹងកំពុងថ្លឹងថ្លែងលើសម្បទានដែលមានលក្ខណៈរសើបផ្នែកនយោបាយជាច្រើននៅក្នុងវិស័យដូចជា កសិកម្ម ថាមពល និងវិស័យការពារជាតិជាដើម ដើម្បីការពារសេដ្ឋកិច្ចដែលពឹងផ្អែកលើការនាំចេញរបស់ខ្លួនពីរបាំងពាណិជ្ជកម្មដ៏ឈឺចាប់៕