ក្រសួងការពារជាតិប៉ូឡូញ បាននិយាយកាលពីថ្ងៃព្រហស្បតិ៍ (២៤ កក្កដា) ថា ប្រទេសប៉ូឡូញ គ្រោងនឹងចុះហត្ថលេខាលើការធានាឥណទាននៃប្រាក់កម្ចីចំនួន ៤ពាន់លានដុល្លារ ពីសហរដ្ឋអាមេរិក ដើម្បីជួយផ្តល់មូលនិធិដល់ទំនើបកម្មនៃកងកម្លាំងប្រដាប់អាវុធរបស់ខ្លួន។

ស្របពេលភាពតានតឹងក្នុងតំបន់កើនឡើងខ្លាំង និងសង្គ្រាមដែលកំពុងបន្តរបស់រុស្ស៊ី នៅអ៊ុយក្រែន ប៉ូឡូញកំពុងបង្កើនការចំណាយលើវិស័យការពារជាតិ និងពន្លឿនកិច្ចខិតខំប្រឹងប្រែងដើម្បីធ្វើទំនើបកម្មយោធារបស់ខ្លួន ក្នុងគោលបំណងពង្រឹងស្លាបខាងកើតរបស់អង្គការណាតូ តតាំងនឹងការគំរាមកំហែងណាមួយ។

ចាប់តាំងពីឆ្នាំ២០២២មក សហរដ្ឋអាមេរិកបានផ្តល់កម្ចី និងការធានាឥណទានកម្ចីដល់ប៉ូឡូញជាង ១១ពាន់លានដុល្លារ ដល់កម្មវិធីផ្តល់ហិរញ្ញប្បទានសព្វាវុធ រួមទាំងប្រព័ន្ធការពារដែនអាកាសប៉ាទ្រីយ៉ូត ប្រព័ន្ធរ៉ូកែត HIMARS និងឧទ្ធម្ភាគចក្រ Apache ។

ជំរុញដោយប្រតិបត្តិការយោធាពេញលក្ខណៈរបស់រុស្ស៊ី លើអ៊ុយក្រែនក្នុងឆ្នាំ២០២២ ប៉ូឡូញបានក្លាយជាអ្នកចំណាយច្រើនជាងគេរបស់អង្គការណាតូ ទាក់ទងនឹងសមាមាត្រទ្រព្យសម្បត្តិជាតិរបស់ខ្លួនលើវិស័យការពារជាតិ។ ទីក្រុងវ៉ាសូវី បាននិយាយថា ខ្លួននឹងចំណាយ ៤,៧% នៃផលិតផលក្នុងស្រុកសរុប GDP លើវិស័យការពារជាតិនៅឆ្នាំ២០២៥ ជាមួយនឹងការសន្យាថានឹងកើនឡើងដល់ ៥% នៅឆ្នាំ២០២៦ ខាងមុខនេះ៕