លោកប្រធានាធិបតី Donald Trump កាលពីថ្ងៃព្រហស្បតិ៍ (ទី២៤ ខែកក្កដា) បាននិយាយថា លោកនឹងមិនរុះរើក្រុមហ៊ុនរបស់លោក Elon Musk ដោយការដកហូតការឧបត្ថម្ភធនរបស់សហព័ន្ធនោះឡើយ ហើយបានទទូចថា លោកចង់ឲ្យអាជីវកម្មរបស់សហគ្រិនមហាសេដ្ឋីរូបនេះទទួលបានជោគជ័យ។

តាមរយៈការបង្ហោះនៅលើបណ្ដាញសង្គម លោក Trump បានរៀបរាប់ថា៖ «មនុស្សគ្រប់គ្នា កំពុងនិយាយថា ខ្ញុំនឹងបំផ្លាញក្រុមហ៊ុនរបស់លោក Elon (Musk) ដោយដកយកមួយចំនួន ប្រសិនបើមិនមែនទាំងអស់ នូវការឧបត្ថម្ភធនដ៏ធំដែលលោកទទួលបានពីរដ្ឋាភិបាលសហរដ្ឋអាមេរិក។ នេះមិនមែនដូច្នោះទេ។ ខ្ញុំចង់ឲ្យលោក Elon និងអាជីវកម្មទាំងអស់នៅក្នុងប្រទេសរបស់យើងរីកចម្រើន»។

ការលើកឡើងនេះបានធ្វើមានបន្ទាប់ពីលោក Musk បានព្រមានវិនិយោគិនរបស់ក្រុមហ៊ុន Tesla កាលពីថ្ងៃពុធថា លទ្ធភាពនៃការកាត់បន្ថយការឧបត្ថម្ភធនលើរថយន្តអគ្គិសនី (EV) អាចនាំឲ្យមាន «ត្រីមាសដ៏លំបាកខ្លះៗ» សម្រាប់ក្រុមហ៊ុន។ នៅក្រោមច្បាប់ពន្ធ និងថវិកាដែលចុះហត្ថលេខាដោយលោក Trump រដ្ឋាភិបាលអាមេរិកនឹងបញ្ចប់ឥណទានពន្ធចំនួន ៧.៥០០ដុល្លារ សម្រាប់រថយន្ត EV ថ្មី និងឥណទាន ៤.០០០ដុល្លារ សម្រាប់រថយន្តដែលបានប្រើប្រាស់រួចហើយ នៅថ្ងៃទី៣០ ខែកញ្ញា។

គួរបញ្ជាក់ថា ទំនាក់ទំនងរបស់លោក Trump និងលោក Musk បានជួបនឹងភាពអាប់អួ កាលពីដើមខែមិថុនា បន្ទាប់ពីលោក Musk បានបរិហារផែនការពន្ធ និងការចំណាយរបស់លោកប្រធានាធិបតី ដោយចាត់ទុកថា ជាសារពើពន្ធមិនប្រុងប្រយ័ត្ន។ ការប៉ះទង្គិចបានកើតឡើងប៉ុន្មានសប្តាហ៍បន្ទាប់ពីលោក Musk បានលាលែងពីតួនាទីរបស់លោកនៅក្នុងរដ្ឋបាលរបស់លោក Trump ដើម្បីផ្តោតលើការបណ្តាក់ទុនអាជីវកម្មរបស់លោក៕