អ្នកការទូតជាន់ខ្ពស់អ៊ីរ៉ង់ កាលពីថ្ងៃព្រហស្បតិ៍ (ទី២៤ ខែកក្កដា) បានឲ្យដឹងថា អ៊ីរ៉ង់បានត្រៀមខ្លួនរួចជាស្រេចក្នុងកិច្ចពិភាក្សា ស្តីពីកម្មវិធីនុយក្លេអ៊ែររបស់ខ្លួនជាមួយសហរដ្ឋអាមេរិក ប៉ុន្តែលុះត្រាតែទីក្រុងវ៉ាស៊ីនតោនចាត់វិធានការប្រកបដោយអត្ថន័យ ក្នុងការកសាងឲ្យមានទំនុកចិត្តឡើងវិញ ដោយការលើកឡើងនេះកើតមាននៅមុនកិច្ចប្រជុំដ៏សំខាន់មួយជាមួយមន្ត្រីអឺរ៉ុប។

ជំនួបនោះនឹងក្លាយជាកិច្ចប្រជុំលើកដំបូង ចាប់តាំងពីបានឈានដល់បទឈប់បាញ់ ក្រោយមានសង្គ្រាមរយៈពេល ១២ថ្ងៃដែលបង្កឡើងដោយអ៊ីស្រាអែលប្រឆាំងនឹងអ៊ីរ៉ង់ កាលពីខែមិថុនា និងបន្ទាប់មកក៏តាមមកដោយយន្តហោះទម្លាក់គ្រាប់បែក B-52 របស់សហរដ្ឋអាមេរិកវាយប្រហារទីតាំងទាក់ទងនឹងនុយក្លេអ៊ែរ នៅក្នុងសាធារណរដ្ឋឥស្លាមផងដែរ។

ការពិភាក្សានឹងនាំមន្ត្រីអ៊ីរ៉ង់ទៅអង្គុយរួមជាមួយមន្ត្រីមកពីចក្រភពអង់គ្លេស បារាំង និងអាល្លឺម៉ង់ ឬ E3 ហើយនឹងរួមបញ្ចូលប្រធានគោលនយោបាយការបរទេសរបស់សហភាពអឺរ៉ុប លោកស្រី Kaja Kallas។ កិច្ចប្រជុំស្រដៀងគ្នានេះ ត្រូវបានធ្វើឡើងនៅទីក្រុងរបស់ប្រទេសទួរគី ក្នុងខែឧសភា។

តាមរយៈការបង្ហោះនៅលើបណ្ដាញសង្គម អនុរដ្ឋមន្ត្រីការបរទេសអ៊ីរ៉ង់ លោក Kazem Gharibabadi បានលើកឡើងថា សម្រាប់កិច្ចពិភាក្សាជាមួយសហរដ្ឋអាមេរិក ទីក្រុងតេអេរ៉ង់នឹងស្វែងរក «គោលការណ៍សំខាន់ៗជាច្រើន» ដែលត្រូវប្រកាន់ខ្ជាប់។ លោកបានរៀបរាប់ថា គោលការណ៍ទាំងនេះ រួមមាន «ការធ្វើឲ្យអ៊ីរ៉ង់ទំនុកចិត្តឡើងវិញ ដោយសារអ៊ីរ៉ង់បាត់ការជឿជាក់លើសហរដ្ឋអាមេរិកហើយ» ដោយបន្ថែមថា វាមិនអាចឲ្យមាន «របៀបវារៈលាក់កំបាំង ដូចជាសកម្មភាពយោធាជាដើម ទោះបីជាអ៊ីរ៉ង់នៅតែរៀបចំយ៉ាងពេញលេញ សម្រាប់សេណារីយ៉ូណាមួយក៏ដោយ»៕