នាយករដ្ឋមន្ត្រីម៉ាឡេស៊ី លោក Anwar Ibrahim កាលពីថ្ងៃព្រហស្បតិ៍ (ទី២៤ ខែកក្កដា) បានប្រកាសនៅលើទំព័របណ្ដាញសង្គម Facebook ផ្លូវការរបស់លោកថា លោកបានជជែកទាំងជាមួយនាយករដ្ឋមន្ត្រីកម្ពុជា និងនាយករដ្ឋមន្ត្រីស្តីទីថៃ ដោយបង្ហាញពីការព្រួយបារម្ភយ៉ាងខ្លាំងរបស់ប្រទេសម៉ាឡេស៊ី ចំពោះភាពតានតឹងដែលកំពុងកើតមាន នៅតាមព្រំដែនកម្ពុជា-ថៃ។

លោក Anwar បានសរសេរថា៖ «ល្ងាចនេះ (ថ្ងៃព្រហស្បតិ៍) ខ្ញុំបានជជែកជាមួយនាយករដ្ឋមន្ត្រីនៃព្រះរាជាណាចក្រកម្ពុជា និងនាយករដ្ឋមន្ត្រីស្តីទីព្រះរាជាណាចក្រថៃ ដោយបង្ហាញពីក្ដីបារម្ភយ៉ាងខ្លាំងរបស់ម៉ាឡេស៊ី ចំពោះការកើនឡើងនូវភាពតានតឹង តាមព្រំដែននៃប្រទេសទាំង២»។

លោកបានបញ្ជាក់បន្ថែមទៀតថា ក្នុងនាមម៉ាឡេស៊ីជាប្រធានអាស៊ាន សម្រាប់ឆ្នាំ២០២៥ លោកបានអំពាវនាវដោយផ្ទាល់ទៅកាន់មេដឹកនាំទាំង២ ឲ្យមានបទឈប់បាញ់ជាបន្ទាន់ ដើម្បីទប់ស្កាត់កុំឲ្យមានអរិភាពបន្ថែមទៀត និងបើកឲ្យមានឧកាសសន្ទនាគ្នា ដោយសន្តិវិធី និងស្វែងរកដំណោះស្រាយការទូត។

នៅក្នុងសេចក្តីថ្លែងការណ៍មួយ នាថ្ងៃសុក្រ (ទី២៥ ខែកក្កដា) នេះ រដ្ឋមន្ត្រីការបរទេសម៉ាឡេស៊ី លោក Datuk Seri Mohamad Hasan បានលើកឡើងថា ប្រទេសម៉ាឡេស៊ីកំពុងតាមដានដោយមានក្តីបារម្ភយ៉ាងខ្លាំង ចំពោះការប៉ះទង្គិចគ្នា រវាងកងកម្លាំងយោធាថៃ និងកម្ពុជា នៅតាមព្រំដែនជម្លោះ កាលពីថ្ងៃព្រហស្បតិ៍ (ទី២៤ ខែកក្កដា)។

លោកបានមានប្រសាសន៍ថា៖ «យើងជំរុញឲ្យភាគីទាំង២ អនុវត្តនូវការអត់ធ្មត់ខ្ពស់បំផុត និងចាត់វិធានការជាបន្ទាន់ ដើម្បីបន្ថយភាពតានតឹង។ ម៉ាឡេស៊ីបានត្រៀមខ្លួនរួចជាស្រេចក្នុងការផ្តល់ជំនួយផ្នែកការទូតរបស់ប្រធានអាស៊ាន ដើម្បីជួយសម្របសម្រួលមធ្យោបាយប្រកបដោយមិត្តភាពឆ្ពោះទៅរកការដោះស្រាយបញ្ហា ដែលភាគីទាំង២ អាចទទួលយកបាន»៕