លោកស្រី Valentina Matviyenko ប្រធានក្រុមប្រឹក្សាសហព័ន្ធ ដែលជាសភាជាន់ខ្ពស់របស់ប្រទេសរុស្ស៊ី បានថ្លែងនៅក្នុងសន្និសីទសារព័ត៌មានថា ការដាក់ទណ្ឌកម្មចុងក្រោយរបស់សហភាពអឺរ៉ុបទៅលើទីក្រុងមូស្គូ នឹងមិនត្រឹមតែធ្វើឲ្យប៉ះពាល់ដល់អឺរ៉ុបខ្លួនឯងប៉ុណ្ណោះទេ ថែមទាំងអាចប៉ះពាល់យ៉ាងធ្ងន់ធ្ងរដល់សេដ្ឋកិច្ចពិភពលោកផងដែរ។

លោកស្រី បាននិយាយថា៖«រាល់ការដាក់ទណ្ឌកម្មថ្មីៗទាំងនេះ មិនគ្រាន់តែប៉ះពាល់ដល់អឺរ៉ុបទេ។ ពួកវា អាចមានផលប៉ះពាល់យ៉ាងធ្ងន់ធ្ងរដល់សេដ្ឋកិច្ចពិភពលោក ចំពោះអត្រាកំណើនពិភពលោក។ វានឹងប៉ះពាល់ដល់បរិយាកាសសេដ្ឋកិច្ចពិភពលោកទាំងមូល»។

លោកស្រីនេះ បានលើកឡើងថា ផលវិបាកនៃការដាក់ទណ្ឌកម្មសម្រាប់អឺរ៉ុប គឺជាក់ស្តែង។ លោកស្រី បានកត់សម្គាល់ ដោយលើកយកប្រទេសអាល្លឺម៉ង់ជាឧទាហរណ៍មួយថា៖«យើងកំពុងមើលឃើញការធ្លាក់ចុះនៃកម្រិតជីវភាពរស់នៅ ភាពគ្មានឧស្សាហកម្ម និងការធ្លាក់ចុះនៃសេដ្ឋកិច្ចទាំងមូល»។ «ជាការពិត ដំណើរការទាំងអស់នេះ នៅតែបន្តឥតឈប់ឈរ៖ វិបត្តិសេដ្ឋកិច្ច ភាពគ្មានឧស្សាហកម្ម ការកើនឡើងគួរឲ្យកត់សម្គាល់នៃតម្លៃសម្រាប់អ្វីៗគ្រប់យ៉ាង និងការថយចុះកម្រិតជីវភាពរបស់ប្រជាជន។ ក្នុងពេលជាមួយគ្នានេះ ប្រទេសអាល្លឺម៉ង់ បានប្រកាសថា ខ្លួននឹងបែងចែកប្រាក់ចំនួន ៩ ពាន់លានអឺរ៉ូសម្រាប់ជំនួយយោធា ដល់អ៊ុយក្រែន។ ជំនួយទាំងអស់នេះ ចំពេលមានការកើនឡើងនៃបំណុលជាតិ និងឱនភាពថវិកា។ មានមនុស្សម្នាក់ បានឆ្ងល់ថាតើថវិកាទាំងអស់នេះ បានមកពីណា ហើយអ្នកណាខ្លះជាអ្នកចំណាយ?»។