សហរដ្ឋអាមេរិក៖ នាយកប្រតិបត្តិក្រុមហ៊ុនបាននិយាយកាលពីថ្ងៃចន្ទថា ថ្នាំគ្រាប់ព្យាបាលជំងឺ COVID-19 ឈ្មោះ Molnupiravir របស់ក្រុមហ៊ុនផលិតឱសថ Merck មានយន្តការការអនុវត្តិសកម្មភាពដែលអាចប្រឆាំងនឹងការឆ្លងវីរុសបម្លែងខ្លួនថ្មី Omicron និងវីរុសបម្លែងខ្លួនថ្មីផ្សេងៗទៀតបាន។
លោក Dean Li អគ្គនាយករបស់មជ្ឈមណ្ឌលស្រាវជ្រាវមន្ទីរពិសោធន៍បាននិយាយថា យើងមានការជឿជាក់ថា ឱសថនេះនឹងមានប្រសិទ្ធភាព យន្តការក្នុងមូលីគុលនេះនឹងមានប្រសិទ្ធភាពទប់ស្កាត់វីរុសបម្លែងខ្លួនថ្មី Omicron ហើយខ្ញុំគិតថា វានឹងអាចប្រឆាំងវីរុសបម្លែងខ្លួនថ្មីផ្សេងទៀតដែលមាននៅពេលអនាគត។ ទិន្នន័យស្ដីពីប្រសិទ្ធភាពរបស់ឱសថ Molnupiravir ក្នុងការបង្ការមិនឲ្យឆ្លងវីរុសបម្លែងខ្លួនថ្មី Omicron នៅមិនទាន់បញ្ជាក់នៅឡើយទេ ប៉ុន្តែថ្នាំគ្រាប់នេះត្រូវបានបង្ហាញថា មានប្រសិទ្ធភាព ៣០% ក្នុងការកាត់បន្ថយចំនួនអ្នកជំងឺចូលសម្រាកព្យាបាលនៅមន្ទីរពេទ្យ និងចំនួនមនុស្សស្លាប់ដែលបានផ្អែកលើទិន្នន័យបានមកពីអ្នកជំងឺ ១,៤៣៣នាក់ជាទិន្នន័យចុងក្រោយដែលបានបញ្ចេញកាលពីខែវិច្ឆិកាកន្លងទៅ។
ថ្នាំគ្រាប់នេះទទួលបានការអញ្ញាតឲ្យប្រើប្រាស់ពីរដ្ឋបាលចំណីអាហារសហរដ្ឋអាមេរិកកាលពីខែមុន ព្រមទាំងមានប្រទេសមួយចំនួនដូចជា អង់គ្លេស ជប៉ុន និងឥណ្ឌា រួមទាំងប្រទេសផ្សេងទៀតរួមទាំងសហរដ្ឋអាមេរិកផងដែរបានចុះកិច្ចព្រមព្រៀងទិញឱសថគ្រាប់នេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
