យ៉ាងហោចណាស់នៅក្នុងកិច្ចប្រជុំកំពូលចុងក្រោយរបស់អង្គការណាតូ នៅទីក្រុងឡាអេ ប្រទេសហូឡង់ សម្ព័ន្ធភាពបានប្រកាសថា សមាជិកបានកំណត់គោលដៅថ្មីនៃការចំណាយ ៥ភាគរយនៃផលិតផលក្នុងស្រុកសរុប (GDP) លើវិស័យការពារជាតិ និងសន្តិសុខ នៅឆ្នាំ២០៣៥។ ការសម្រេចបែបនេះ មួយផ្នែកទំនងជាត្រូវបានជំរុញដោយការយល់ឃើញ ដែលថា ផ្នែកការទូតរបស់លោក Steve Witkoff ដែលជាបេសកជនរបស់លោក Donald Trump និងការថ្កោលទោសរបស់អឺរ៉ុប ចំពោះប្រធានាធិបតីរុស្ស៊ី លោក Vladimir Putin នឹងមិនគ្រប់គ្រាន់ ដើម្បីបញ្ចប់សង្រ្គាមនៅអ៊ុយក្រែននោះឡើយ។ 

តែទោះជាយ៉ាងណាក្ដី អ្វីដែលសំខាន់ទៀតនោះ គឺថា សមាជិកកំពុងដឹងច្បាស់ពីតម្រូវការ ក្នុងការរារាំងរុស្ស៊ីកុំឲ្យវាយប្រហារលើប្រទេសសមាជិកអង្គការណាតូ ដោយយោងទៅតាមលោក Mark Rutte អគ្គលេខាធិការសម្ព័ន្ធភាពយោធាមួយនេះ បានឲ្យដឹងថា វាអាចនឹងត្រៀមរួចរាល់ក្នុងរយៈពេល ៥ឆ្នាំខាងមុខ។

អ្នកវិភាគមួយរូប បានលើកឡើងថា ក្នុងនាមជាអ្នកវិភាគចារកម្មយោធាដែលមានឯកទេសប៉ាន់ស្មានដល់ការគិតរបស់លោក Putin និងយុទ្ធសាស្ត្រយោធារបស់រុស្ស៊ី លោកយល់ស្របជាមួយនឹងការវាយតម្លៃរបស់លោក Rutte អំពីការត្រៀមខ្លួនរបស់រុស្ស៊ី សម្រាប់យុទ្ធនាការយោធាវាយលុកមួយផ្សេងទៀត ក្នុងរយៈពេលតែត្រឹមតែប៉ុន្មានឆ្នាំប៉ុណ្ណោះ។ 

យ៉ាងណាក៏ដោយ ក្នុងរយៈពេលប៉ុន្មានឆ្នាំខាងមុខនេះ អាចមានសារៈសំខាន់ខ្លាំង ក្នុងការកំណត់ថា តើលោក Putin សម្រេចវាយប្រហាររដ្ឋក្រោយសហភាពសូវៀតណាមួយទៀត ដូចជាប្រទេសម៉ុលដាវីដែរ ឬយ៉ាងណា៕