សារព័ត៌មាន Financial Times (FT) បានរាយការណ៍ដោយដកស្រង់សម្តីប្រភពថា បណ្តាប្រទេសអ៊ឺរ៉ុបដែលពាក់ព័ន្ធក្នុងការដោះស្រាយវិបត្តិនុយក្លេអ៊ែរអ៊ីរ៉ង់ គឺ ចក្រភពអង់គ្លេស អាល្លឺម៉ង់ និងបារាំង បានរៀបចំផ្តល់ជូនទីក្រុងតេអេរ៉ង់នូវការពន្យារពេលលើការដាក់ទណ្ឌកម្ម ប្រសិនបើខ្លួនយល់ព្រមបន្តកិច្ចសន្ទនាជាមួយសហរដ្ឋអាមេរិក និងទីភ្នាក់ងារថាមពលបរមាណូអន្តរជាតិ (IAEA)។  

យោងតាមរបាយការណ៍ ការពន្យារពេលដែលបានស្នើឡើង នឹងមានរយៈពេលជាច្រើនខែ ហើយនឹងអាស្រ័យលើការអនុម័តសេចក្តីសម្រេចដែលពាក់ព័ន្ធដោយក្រុមប្រឹក្សាសន្តិសុខអង្គការសហប្រជាជាតិ។ ការបន្ធូរបន្ថយទណ្ឌកម្មណាមួយ នឹងទាក់ទងនឹងការចូលរួមរបស់អ៊ីរ៉ង់ ក្នុងការចរចាជាមួយក្រុងវ៉ាស៊ីនតោន និងកិច្ចសហប្រតិបត្តិការរបស់ខ្លួន ជាមួយក្រុមអធិការកិច្ចរបស់ទីភ្នាក់ងារ IAEA។ ព័ត៌មានលម្អិតបន្ថែម មិនត្រូវបានបង្ហាញទេ។

កាលពីថ្ងៃទី ២១ ខែកក្កដា អ្នកនាំពាក្យក្រសួងការបរទេសអ៊ីរ៉ង់ លោក Esmail Baghaei បានប្រកាសថា កិច្ចចរចាថ្មីរវាងអ៊ីរ៉ង់ និងប្រទេសទាំងបី ប្រព្រឹត្តទៅនៅថ្ងៃទី ២៥ ខែកក្កដានេះ នៅទីក្រុងអ៊ីស្តង់ប៊ុល ក្នុងកម្រិតអនុរដ្ឋមន្ត្រីការបរទេស។

កាលពីដើមឆ្នាំនេះ ការចរចាចំនួន ៥ជុំ រវាងអ៊ីរ៉ង់ និងសហរដ្ឋអាមេរិក បានបរាជ័យក្នុងការទទួលបានវឌ្ឍនភាពគួរឲ្យកត់សម្គាល់។ ដំណើរការការទូត ត្រូវបានរារាំងដោយប្រតិបត្តិការយោធារបស់អ៊ីស្រាអែលសំដៅលើប្រទេសអ៊ីរ៉ង់ បន្ទាប់មកដោយការវាយប្រហាររបស់សហរដ្ឋអាមេរិកទៅលើទីតាំងសំខាន់ៗចំនួនបីទាក់ទងនឹងកម្មវិធីនុយក្លេអ៊ែររបស់ទីក្រុងតេអេរ៉ង់។ ទន្ទឹមនឹងនេះ តំណាងអឺរ៉ុប បន្តការចរចាដាច់ដោយឡែកជាមួយមន្ត្រីអ៊ីរ៉ង់។