យោងតាមសេចក្តីរាយការណ៍ក្នុងស្រុក បានឲ្យដឹងថា កុមារយ៉ាងហោច ៧នាក់ បានស្លាប់ និងកុមារ ២៦នាក់ផ្សេងទៀត រងរបួស ក្រោយដំបូលអគារសាលារៀនមួយខ្នង បានបាក់នៅរដ្ឋភាគខាងលិច Rajasthan ប្រទេសឥណ្ឌា ។

សោកនាដកម្មនេះ បានកើតឡើងនៅព្រឹកថ្ងៃសុក្រ ភ្លាមៗក្រោយពិធីបួងសួងពេលព្រឹកនៅសាលារដ្ឋ ស្ថិតក្នុងស្រុក Barmer ។ ក្រុមអាជ្ញាធរ និយាយថា កូនសិស្សជាង ៣០បាននៅក្នុងថ្នាក់រៀន ពេលដែលពិដានបាក់សង្កត់ភ្លាមៗ ។

នគរបាលក្នុងស្រុកជឿថា រចនាសម្ព័ន្ធទ្រុធទ្រោមរបស់អគារដែលកាន់តែអាក្រក់ទៅដោយសារភ្លៀងធ្លាក់ខ្លាំងក្នុងរយៈពេលថ្មីៗនេះ អាចបណ្តាលឲ្យបាក់ដំបូលថ្នាក់រៀនបែបនេះ ។ 

លោក Amit Kumar គឺជាមន្រ្តីនគរបាលជាន់ខ្ពស់មួយរូបនិយាយប្រាប់កាសែត Press Trust of India ថា កុមាររងរបួសមួយចំនួន ស្ថិតក្នុងស្ថានភាពធ្ងន់ធ្ងរ ។

លោក Madan Dilawar គឺជារដ្ឋមន្រ្តីមន្ទីរអប់រំរដ្ឋ Rajasthan និយាយថា លោកបានណែនាំឲ្យក្រុមមន្រ្តីត្រួតពិនិត្យការព្យាបាលកុមាររងរបួស និងធានាថាគ្រួសារទទួលបានការគាំទ្រ ។

លោកនិយាយប្រាប់ទូរទស្សន៍ AajTak ថា លោកបានបញ្ជាក្រុមអាជ្ញាធរ រៀបចំឲ្យបានសមរម្យ និងពិនិត្យមើលការព្យាបាលក្មេងៗ ហើយនិងធានាថា ពួកគេមិនប្រឈមនឹងការលំបាកណាមួយនោះឡើយ ។

លោក Dilawar បន្តថា ការស៊ើបអង្កេតផ្លូវការនឹងធ្វើឡើង ដើម្បីកំណត់មូលហេតុពិតប្រាកដបណ្តាលឲ្យកើតមានឧបទ្ទេវហេតុមួយនេះ ៕