ក្រុមជួយសង្រ្គោះនៅតំបន់ភាគខាងជើងហ្វីលីពីន បានប្រើប្រាស់ទូក ដើម្បីទៅទទួលអ្នកស្រុកជាប់ខ្លួនក្នុងទឹកជំនន់នៅថ្ងៃសុក្រនេះ ស្របពេលដែលព្យុះទីហ្វុង Co-May ថមថយកម្លាំងមកនៅជាកម្រិតព្យុះត្រូពិកវិញ ហើយចំនួនមនុស្សស្លាប់ពីភ្លៀងធ្លាក់ក្នុងសប្តាហ៍នេះ បន្តកើនឡើង ។

សាលារៀនបន្តបិទទ្វារ ហើយចរន្តអគ្គិសនីបានដាច់នៅតាមតំបន់ជាច្រើន ស្របពេលដែលទីភ្នាក់ងារគ្រោះមហន្តរាយជាតិ រាយការណ៍ករណីស្លាប់មនុស្ស ២៥នាក់ និងមនុស្ស ៨នាក់ផ្សេងទៀត កំពុងបាត់ខ្លួន ចាប់តាំងពីថ្ងៃសុក្រសប្តាហ៍រហូតមក ។

យោងតាមការអះអាងរបស់ក្រុមជួយសង្រ្គោះ បានឲ្យដឹងថា អ្នកដែលមិនទាន់បានរាប់បញ្ចូល គឺកម្មករសំណង់ ៣នាក់ដែលបានកប់ក្នុងបំណាក់ដី ពេលដែលពួកគេសម្រាកនៅការដ្ឋានសំណង់កាលពីថ្ងៃព្រហស្បតិ៍ នៅខេត្ត Cavite ស្ថិតនៅភាគខាងត្បូងរដ្ឋធានីម៉ានីល ។

អ្នកស្រី Rosario Jose គឺជាសមាជិកជួយសង្រ្គោះ និយាយថា ជញ្ជាំងការដ្ឋានសំណង់របស់ពួកគេ បានបាក់សង្កត់លើមនុស្សនៅពីក្រោម រយៈពេលច្រើនថ្ងៃក្រោយភ្លៀងធ្លាក់ខ្លាំង បានធ្វើឲ្យដីទន់ ។

អ្នកស្រីបន្តថា សាកសពមនុស្សទាំងអស់ ត្រូវបានរកឃើញនៅក្នុងភក់ ។ អ្នករស់រានម្នាក់គត់ ត្រូវបានទាញចេញពីគំនរបាក់បែក ។

នៅខេត្តតំបន់ឆ្នេរភាគខាងលិច La Union ជាទីដែលព្យុះទីហ្វុង Co-May បានធ្វើដំណើរមកដល់ដីគោកកាលពីប៉ុន្មានម៉ោងមុន សមាជិកគ្រួសារ ៤នាក់ ត្រូវបានជួយសង្រ្គោះនៅព្រឹកថ្ងៃសុក្រនេះ ក្រោយពួកគេជាប់នៅជាន់ទី ២លើផ្ទះឈើរបស់ពួកគេ ។

អ្នកជួយសង្រ្គោះម្នាក់ដែលសុំមិនបញ្ចេញឈ្មោះ និយាយថា ពួកគេមិនអាចចាកចេញពីផ្ទះបានទេ ដោយសារទឹកឡើងដល់ត្រឹមចង្កេះ ហើយពួកគេមានកូនតូចៗ ៕