បាល់ទាត់៖ កីឡាករ សុះ សាលី និង ញឹក សុភារ៉ា បានរកគ្រាប់បាល់ Hat-Trick ដើម្បីជួយក្រុមពង្រឹងឱកាសដណ្ដើមកៅអីវគ្គ ១៦ក្រុមចុងក្រោយនៃពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ខេត្ត) ឆ្នាំ២០២១ រៀងៗខ្លួន ក្រោយយកឈ្នះលើគូប្រកួតក្នុងជំនួបបើកឆាកជើងទី២ កាលពីថ្ងៃទី១០ ខែមីនាម្សិលមិញ។
សម្រាប់កីឡាករ សុះ សាលី បានជួយក្រុមមន្ទីរអប់រំ យុវជន និងកីឡាខេត្តកំពង់ឆ្នាំង យកឈ្នះក្រុមម្ចាស់ផ្ទះខេត្តតាកែវដោយលទ្ធផល ៤-១ ខណៈគ្រាប់បាល់ជ័យជម្នះរបស់ខេត្តកំពង់ឆ្នាំង គឺធ្វើសម្រេចដោយកីឡាករ សុះ សាលី ម្នាក់ឯងនៅនាទីទី៣, នាទីទី៧, នាទី៣៥ និងនាទី៨៧ ស្របពេល ១គ្រាប់របស់ខេត្តតាកែវរកបានដោយកីឡាករ សាវ័ន្ដ រតនវិសារ នៅនាទី១២។ នេះគឺជាជ័យជម្នះលើកទី២ លើខេត្តតាកែវ ដ្បិតកាលពីជើងទី២ ខេត្តកំពង់ឆ្នាំងបានយកឈ្នះក្នុងដី ២-០។ ជ័យជម្នះនេះបានធ្វើឲ្យខេត្តកំពង់ឆ្នាំងមាន ៧ពិន្ទុបណ្ដោះអាសន្នក្នុងពូល A ស្មើគ្នាជាមួយក្រុមន្ទីរអប់រំ យុវជន និងកីឡាខេត្តកំពង់ស្ពឺ តែចាញ់ប្រៀបក្រុមកំពូលតារាង គឺក្រុមភ្នំពេញហ្គាឡាក់ស៊ី ១ពិន្ទុ។ រីឯខេត្តតាកែវគឺបានបាត់បង់ឱកាស ប្រជែងកៅអីវគ្គបន្ដទៅហើយ។
ចំណែកកីឡាករ ញឹក សុភារ៉ា វិញ បានរកគ្រាប់បាល់ Hat-Trick ៣គ្រាប់ម្នាក់ឯងជួយឲ្យក្រុមសូហ្វីយ៉ាប៉ៃលិន យកឈ្នះខេត្តពោធិ៍សាត់ ៥-២ លើទឹកដីរបស់ខ្លួន។ រីឯគ្រាប់បាល់ជ័យជម្នះ ២គ្រាប់ទៀតរបស់ប៉ៃលិន គឺធ្វើសម្រេចដោយកីឡាករ រៀន សុភានិត និងមិត្តរួមក្រុម សុក បូរី ខណៈ ២គ្រាប់របស់ខេត្តពោធិ៍សាត់ រកបានដោយកីឡាករ សាំរិទ្ធ និងកីឡាករ ម៉ម ផស។
ជ័យជម្នះនេះបានធ្វើឲ្យក្រុមសូហ្វីយ៉ាប៉ៃលិន ហក់ឡើងឈរលេខរៀងទី២ និងមាន ៧ពិន្ទុបណ្ដោះអាសន្នក្នុងពូល B នាំមុខក្រុមសហភាពសហព័ន្ធយុវជនកម្ពុជាខេត្តបាត់ដំបង ដែលមាន ៦ពិន្ទុឈរលេខរៀងទី៣ តែតាមពីក្រោយក្រុមកំពូលតារាង ខេត្តបន្ទាយមានជ័យដែលមាន ១០ពិន្ទុក្នុងដៃ។ យ៉ាងណាមិញក្រុមនីមួយៗនៅសល់ ២ប្រកួតក្នុងដៃទៀត ដើម្បីកាត់សេចក្ដីរកក្រុមឡើងវគ្គបន្ដ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
