នៅថ្ងៃសុក្រនេះ កងទ័ពជើងទឹករុស្ស៊ី បានបន្តសមយុទ្ធប្រតិបត្តិការ “July Storm” ដែលត្រូវបានកំណត់ធ្វើឡើងរហូតដល់ថ្ងៃអាទិត្យ ។

ហ្គេមសង្រ្គាមមួយនេះដែលមានការបាញ់គ្រាប់កាំភ្លើងធំពិត និងមីស៊ីលពិត ត្រូវបានធ្វើឡើងនៅតាមដែនទឹក ចាប់ពីមហាសមុទ្រប៉ាស៊ីហ្វិកនៅភាគខាងកើត សមុទ្រ Barents នៅភាគខាងជើង និងសមុទ្របាល់ទិកនៅភាគខាងលិច ។

យោងតាមការអះអាងរបស់ក្រសួងការពារជាតិរុស្ស៊ី បានឲ្យដឹងថា នាវាជាង ១៥០គ្រឿង រួមទាំងនាវាមុជទឹកនុយក្លេអ៊ែរ ក៏ដូចជាយន្តហោះចម្បាំង ១២០គ្រឿង ប្រព័ន្ធមីស៊ីលបាញ់ចេញពីដីគោក ១០គ្រឿង ហើយនិងកងកម្លាំងយោធា ១៥.០០០នាក់ បានចូលរួមសមយុទ្ធយោធានេះ ។ 

ទីបញ្ជាការទាំងអស់ ត្រូវបានបញ្ជាដោយអគ្គមេបញ្ជាការកងទ័ពជើងទឹករុស្ស៊ីលោកឧត្តមនាវីឯក Alexander Moiseev ។

វីដេអូបញ្ចេញនៅថ្ងៃសុក្រនេះ ដោយក្រសួងការពារជាតិរុស្ស៊ី ឃើញនាវាមុជទឹកប្រដាប់មីស៊ីលនុយក្លេអ៊ែរ Orel នៃកងនាវា Russian Northern Fleet កំពុងធ្វើសមយុទ្ធនៅសមុទ្រ Barents ។

កងកម្លាំងនៃកងនាវាប៉ាស៊ីហ្វិក បានវាយប្រហារគោលដៅដោយប្រើប្រាស់មីស៊ីលជាច្រើនប្រភេទ រួមទាំងមីស៊ីលតម្រង់គោលដៅ ។ ពួកគេបានដាក់ពង្រាយប្រព័ន្ធមីស៊ីលបាញ់ចេញពីដីគោក Bastion ដោយមានគោលដៅក្នុងសមុទ្រផងដែរ ។

សូមបញ្ជាក់ថា រុស្ស៊ីមាននូវកងទ័ពជើងទឹកដ៏មានឥទ្ធិពលបំផុតលំដាប់ទី ៣របស់ពិភពលោក បន្ទាប់ពីចិន និងសហរដ្ឋអាមេរិក ៕