វិមានក្រឹមឡាំង និយាយនៅថ្ងៃសុក្រនេះថា កិច្ចប្រជុំកំពូលរវាងប្រធានាធិបតីរុស្ស៊ីលោក Vladimir Putin និងប្រធានាធិបតីអ៊ុយក្រែនលោក Volodymyr Zelenskiy អាចនឹងកើតឡើងទៅបាន ទាល់តែជាជំហានផ្តាច់ព្រ័ត្រ ដើម្បីសម្រេចបានកិច្ចព្រមព្រៀងសន្តិភាព ។

អ្នកនាំពាក្យវិមានក្រឹមឡាំងលោក Dmitry Peskov និយាយថា វាទំនងជាជំនួបបែបនេះមិនអាចកើតឡើងបានឡើយនៅដំណាច់ខែសីហា ដូចអ្វីដែលអ៊ុយក្រែនបានស្នើសុំ ។

លោក Peskov បាននិយាយប្រាប់ក្រុមអ្នកសារព័ត៌មានថា ជំនួបកំពូលគួរតែជាចំណុចផ្តាច់ព្រ័ត្រលើការដោះស្រាយសន្តិភាព និងពង្រឹងទម្រង់បែបបទ និងកិច្ចព្រមព្រៀង ដោះស្រាយឡើងដោយក្រុមអ្នកជំនាញ ។ វាមិនអាចទៅរួចនោះឡើយ ក្នុងការធ្វើវាតាមរបៀបជុំផ្សេងទៀតនោះ ។

លោកបន្តថា តើវាអាចទៅរួចដែរឬទេ ក្នុងការឆ្លងកាត់ដំណើរការដ៏ស្មុគ្រស្មាញបែបនេះក្នុងរយៈពេល ៣០ថ្ងៃនោះ? ច្បាស់ណាស់ថា វាទំនងជាមិនអាចកើតឡើងបានឡើយ ។

ប្រតិភូអ៊ុយក្រែននិយាយក្រោយជុំចុងក្រោយនៃកិច្ចប្រជុំសន្តិភាពរវាងភាគីទាំង ២កាលពីថ្ងៃពុធថា ទីក្រុងគីវ ស្នើសុំឲ្យមានជំនួបលោក Putin-Zelenskiy នៅខែសីហា ពីព្រោះថាវាស្ថិតក្នុងឱសានវាទរយៈពេល ៥០ថ្ងៃ ដែលប្រធានាធិបតីសហរដ្ឋអាមេរិកលោក Donald Trump បានកំណត់ឲ្យមានកិច្ចព្រមព្រៀងកាលពីសប្តាហ៍មុន ។

លោក Trump បានគំរាមដាក់ទណ្ឌកម្មថ្មីលើរុស្ស៊ី និងអ្នកទិញទំនិញនាំចេញរបស់ពួកគេ លុះត្រាតែកិច្ចព្រមព្រៀងឈានដល់នៅដើមខែកញ្ញា ៕