ឯកអគ្គរដ្ឋទូតហ្វីលីពីនប្រចាំនៅសហរដ្ឋអាមេរិក លោក Jose Manuel Romualdez នៅថ្ងៃសុក្រ (ទី២៥ ខែកក្កដា) នេះថា ទីក្រុងម៉ានីល សង្ឃឹមថា នឹងអាចចរចាឡើងវិញនូវកិច្ចព្រមព្រៀងពាណិជ្ជកម្មដែលខ្លួន បានឈានដល់ជាមួយសហរដ្ឋអាមេរិក នៅដើមសប្តាហ៍នេះ ក្នុងកម្រិតអត្រាពន្ធថ្មី ១៩ភាគរយ។

លោក Romualdez បានប្រាប់ប្រព័ន្ធផ្សព្វផ្សាយ CNA ថា៖ «វាគឺច្បាស់ណាស់ថា យើងនៅតែអាចចាប់ផ្ដើមចរចាឡើងវិញបាន។ ប្រធានក្រុមពាណិជ្ជកម្មរបស់យើង ប្រហែលជានឹងត្រលប់ទីក្រុងវ៉ាស៊ីនតោនវិញ ដើម្បីរកវិធីដែលយើងនៅតែអាចដោះស្រាយ ដើម្បីបញ្ចុះអាត្រាពន្ធឲ្យទាបបន្ថែមទៀត»។

លោកបានបញ្ជាក់បន្ថែមថា៖ «លោកប្រធានាធិបតី Trump បានប្រកាសថា កម្រិតទាបបំផុតដែលលោកនឹងដាក់ គឺ ១៥ភាគរយ សម្រាប់ប្រទេសណាមួយ ដូច្នេះ យើងនៅតែសង្ឃឹមថា យើងនឹងអាចទទួលបានការបន្ថយកម្រិតពន្ធរបស់យើងឲ្យធ្លាក់នៅប្រហែលតួលេខដូចគ្នានេះ»។

កាលពីថ្ងៃពុធ (ទី២៣ ខែកក្កដា) លោក Trump បានលើកឡើងថា សហរដ្ឋអាមេរិកនឹងជ្រើសរើសដាក់អត្រាពន្ធ «គ្រប់ទីកន្លែង រវាងកម្រិត ១៥ភាគរយ និង ៥០ភាគរយ លើដៃគូពាណិជ្ជកម្មរបស់ខ្លួន ពោលគឺច្រើនជាងអត្រាមូលដ្ឋាន ១០ភាគរយដែលលោកបានកំណត់កាលពីខែមេសា។ ការប្រកាសនោះកើតឡើងស្របពេលដែលសហរដ្ឋអាមេរិកបានមានវឌ្ឍនភាព លើកិច្ចព្រមព្រៀងជាច្រើន ក្នុងរង្វង់តួលេខទាំងនោះ ដោយកាលកំណត់ថ្ងៃទី១ ខែសីហា សម្រាប់ការចរចា កាន់តែកៀកមែនទែនហើយ។

ពន្ធថ្មី ១៩ភាគរយ លើហ្វីលីពីន គឺទាបជាង ២០ភាគរយដែលត្រូវបានគំរាមកំហែងដាក់ដោយលោក Trump កាលពីដើមខែនេះ ប៉ុន្តែនៅតែលើសពីអត្រា ១៧ភាគរយដែលលោកបានស្នើកាលពីខែមេសា ក្រោមផែនការដាក់ពន្ធបដិការលើប្រទេសរាប់សិប៕