អនុប្រធានាធិបតីហ្វីលីពីន លោកស្រី Sara Duterte បានទទួលជ័យជម្នះផ្នែកផ្លូវច្បាប់ដ៏សំខាន់មួយ នាថ្ងៃសុក្រ (ទី២៥ ខែកក្កដា) នេះ នៅពេលដែលតុលាការកំពូលបានច្រានចោលបណ្តឹងចោទប្រកាន់ទម្លាក់តំណែង ចំពោះរូបលោកស្រី ដោយសម្រេចថា វាគឺផ្ទុយនឹងរដ្ឋធម្មនុញ្ញ។

គួររំលឹកថា សភាជាន់ទាបបានចោទប្រកាន់ទម្លាក់តំណែងលោកស្រី Duterte កាលពីខែកុម្ភៈ ដោយចោទប្រកាន់លោកស្រីពីបទប្រើប្រាស់ថវិកាសាធារណៈមិនត្រឹមត្រូវ មានទ្រព្យសម្បត្តិច្រើនឡើងខុសពីធម្មតា និងគំរាមកំហែងសម្លាប់ប្រធានាធិបតីហ្វីលីពីនលោក Ferdinand Marcos Jr. ស្ត្រីទី១ និងប្រធានសភា។

តុលាការបានប្រាប់ថា ស្ថាប័នមិនបានសម្រេចលើកលែងការចោទប្រកាន់លើលោកស្រី Duterte នោះទេ ប៉ុន្តែទោះជាយ៉ាងនេះក្តី សេចក្តីសម្រេចនេះអាចជាការជំរុញដ៏ធំមួយ សម្រាប់មហិច្ឆតានយោបាយរបស់លោកស្រី។

លោកស្រីត្រូវបានគេមើលឃើញយ៉ាងទូលំទូលាយថា ជាអ្នកប្រកួតប្រជែងដ៏សំខាន់ សម្រាប់តំណែងប្រធានាធិបតីឆ្នាំ២០២៨ ដែលលោក Marcos មិនអាចឈរឈ្មោះបានទៀតទេ ដោយសារហ្វីលីពីនកំណត់តែ ១អាណត្តិប៉ុណ្ណោះ សម្រាប់តំណែងនេះ ប៉ុន្តែការផ្ដន្ទាទោសលើការចោទប្រកាន់ទម្លាក់តំណែងនេះ នឹងត្រូវហាមឃាត់មិនឲ្យលោកស្រីចូលរួមប្រជែងតំណែងនេះអស់មួយជីវិត។

លោកស្រី Duterte បានលើកឡើងថា ចំណាត់ការចោទប្រកាន់លោកស្រី ដែលបានកើតឡើង ចំពេលមានជម្លោះយ៉ាងខ្លាំងក្លា ជាមួយលោក Marcos គឺមានហេតុផលនយោបាយ។

មេធាវីរបស់លោកស្រី Duterte បានឲ្យដឹងនៅក្នុងសេចក្តីថ្លែងការណ៍មួយថា៖ «ការសម្រេចជាឯកច្ឆន្ទនេះ ជាថ្មីម្តងទៀត បានលើកកម្ពស់នីតិរដ្ឋ និងបានពង្រឹងការការពារដោយរដ្ឋធម្មនុញ្ញ ប្រឆាំងនឹងការរំលោភបំពាន ជុំវិញដំណើរការចោទប្រកាន់ទម្លាក់តំណែងនេះ»៕