រដ្ឋាភិបាលបានឲ្យដឹងថា យ៉ាងហោចណាស់មនុស្ស ៩នាក់ ក្នុងនោះរួមមានទាំងកុមារផងដែរ បានបាត់បង់ជីវិត ខណៈជិត ២០នាក់ផ្សេងទៀត បានរងរបួស នៅពេលដែលរថយន្តក្រុងមួយ បានជួបឧប្ទវហេតុ នាព្រឹកព្រលឹមថ្ងៃសុក្រ (ទី២៥ ខែកក្កដា) នេះ នៅភាគកណ្តាលនៃប្រទេសវៀតណាម។

រដ្ឋាភិបាល បានឲ្យដឹងនៅក្នុងសេចក្តីថ្លែងការណ៍មួយថា ឧបទ្ទវហេតុដែលបានកើតឡើងនៅវេលាម៉ោង ១:៤៥នាទីព្រឹក (ម៉ោងក្នុងស្រុក) នៅក្នុងខេត្ត Ha Tinh ភាគកណ្តាល ក្រៅពីមានអ្នកស្លាប់ ក៏បានបណ្ដាលឲ្យមនុស្ស ១៦នាក់ផ្សេងទៀតរងរបួសដែរ។

របាយការណ៍របស់រដ្ឋាភិបាល បានបញ្ជាក់ថា រថយន្តក្រុងនេះ កំពុងធ្វើដំណើរពីរដ្ឋធានីហាណូយ ទៅកាន់ទីក្រុងដាណាង នៅពេលដែលវារេចេញពីផ្លូវ ហើយបានទៅបុកស្លាកសញ្ញាចរាចរណ៍ មុនពេលក្រឡាប់។

រដ្ឋាភិបាលបាននិយាយថា ជនរងគ្រោះដែលរងរបួសទាំងអស់ត្រូវ បានបញ្ជូនទៅមន្ទីរពេទ្យ ដោយមានរបួសលើខ្លួនជាច្រើន ខណៈដែលអ្នកស្លាប់មានអាយុចន្លោះពី ៤ឆ្នាំ ទៅ ៤៩ឆ្នាំ៕