​

នៅតាមតំបន់ឆ្នេរព្រៃជប់ភ្លៀងអាម៉ាហ្សូន ប្រទេសប្រេស៊ីល ព្រៃកោងកាងដែលស្ថិតក្នុងចំណោមព្រៃកោងកាងសំខាន់ជាងគេបំផុតរបស់ពិភពលោក និងបានលាតសន្ធឹងតាមតំបន់ឆ្នេរនៅទូទាំងរដ្ឋចំនួន ៣ គឺរដ្ឋ Amapa, Para និងរដ្ឋ Maranhaoនោះ បានបម្រើជាអាវុធដ៏សំខាន់ប្រឆាំងបម្រែបម្រួលអាកាសធាតុ និងជាបរិក្ខារសេដ្ឋកិច្ចសម្រាប់មនុស្សរាប់ម៉ឺនគ្រួសារ ។

យោងតាមការអះអាងរបស់ក្រុមអ្នកស្រាវជ្រាវប្រេស៊ីល បានឲ្យដឹងថា ដីវាលទំនាបតំបន់ឆ្នេរដ៏ធំល្វឹងល្វើយនេះ តំណាងឲ្យតំបន់មួយក្នុងចំណោមតំបន់ប្រព័ន្ធអេកូឡូស៊ីកាបូនខៀវដ៏មានឥទ្ធិពលបំផុតរបស់ផែនដី អាចស្តុកបរិមាណកាបូនដ៏ច្រើនមហិមាទៅក្នុងដីលេចទឹករបស់វា ។

លោកសាស្រ្តាចារ្យ Denilson da Silva Bezerra មកពីសាកលវិទ្យាល័យសហព័ន្ធ Maranhao ដែលបានសង្កត់ធ្ងន់ពីតួនាទីរបស់វានៅក្នុងច្បាប់អាកាសធាតុសកលនោះ និយាយថា ព្រៃកោងកាងទាំងអស់នេះ មានសតម្ថភាពចាប់យកកាបូនដ៏សំខាន់ ។

ក្រៅពីគុណតម្លៃបរិស្ថានរបស់វា ព្រៃកោងកាង បានទ្រទ្រង់ជីវិតទាំងមូល ។ សម្ព័ន្ធព្រៃកោងកាងសកល រាយការណ៍ថា មនុស្សជាង ៣ម៉ឺនគ្រួសារ បានចាត់ទុកព្រៃកោងតាងតំបន់ឆ្នេរទាំងអស់នេះ ថាជាផ្ទះរបស់ពួកគេ ដោយពួកគេរកស៊ីចិញ្ចឹមជីវិតរបស់ពួកគេតាមរយៈការនេសាទត្រី ទេសចរណ៍អេកូឡូស៊ី និងការចិញ្ចឹមឃ្មុំ ។

ក្រុមអ្នកនេសាទក្តាមតាមប្រពៃណី តំណាងឲ្យសហគមន៍មួយក្នុងចំណោមសហគមន៍ជាច្រើនទៀតដែលសកម្មភាពវប្បធម៌ និងសេដ្ឋកិច្ចរបស់ពួកគេ ត្រូវបានភ្ជាប់ជាមួយប្រព័ន្ធអេកូឡូស៊ី ។

នៅតាមរដ្ឋខ្លះរបស់ប្រទេសប្រេស៊ីល ការនេសាទត្រីនៅតាមព្រៃកោងកាង ស្មើនឹង ៥០ភាគរយនៃផលនេសាទទាំងមូល ក្នុងនោះគ្រួសារជាច្រើនបានប្រមូលផលក្តាម ខ្យង ត្រី និងបង្គា ដោយប្រើប្រាស់វិធីសាស្រ្តបែបប្រពៃណីដែលបានបន្សល់ទុកពីមួយជំនាន់ ទៅមួយជំនាន់ ៕