អគ្គលេខាធិការអង្គការសហប្រជាជាតិ លោក Antonio Guterres កាលពីថ្ងៃសុក្រ បានរិះគន់សហគមន៍អន្តរជាតិចំពោះការបិទភ្នែកក្នុងពេលភាពស្រេកឃ្លានរាលដាលនៅក្នុងតំបន់ហ្កាហ្សា ដោយចាត់ទុកវាថាជា «វិបត្តិសីលធម៌ដែលប្រឈមទៅនឹងមនសិការសកល» ។

លោក Guterres បានប្រាប់សភាសកលរបស់អង្គការលើកលែងទោសអន្តរជាតិ តាមរយៈបណ្តាញវីដេអូថា «ខ្ញុំមិនអាចពន្យល់ពីកម្រិតនៃការព្រងើយកន្តើយ និងភាពអសកម្ម ដែលយើងមើលឃើញដោយមនុស្សជាច្រើននៅក្នុងសហគមន៍អន្តរជាតិនោះទេ ជាការខ្វះភាពអាណិតអាសូរ ខ្វះការពិត និងកង្វះមនុស្សជាតិ»។

«នេះពុំមែនគ្រាន់តែជាវិបត្តិមនុស្សធម៌ប៉ុណ្ណោះទេ។ វាគឺជាវិបត្តិសីលធម៌ដែលប្រឈមនឹងមនសិការសកល។ យើងនឹងបន្តនិយាយនៅគ្រប់ពេលវេលាទាំងអស់»។ ក្រុមផ្តល់ជំនួយ បានព្រមានអំពីការកើនឡើងនូវករណីនៃភាពស្រេកឃ្លាន ជាពិសេសក្នុងចំណោមកុមារ នៅក្នុងតំបន់ហ្កាហ្សារងការបំផ្លាញដោយសង្រ្គាម ដែលអ៊ីស្រាអែលបានបិទផ្លូវជំនួយកាលពីខែមីនា ក្នុងពេលមានសង្រ្គាមនៅបន្តជាមួយក្រុមហាម៉ាស។ ការបិទផ្លូវនោះ ត្រូវបានបន្ធូរបន្ថយដោយផ្នែករយៈពេលពីរខែក្រោយមក។

ការហូរចូលនៃជំនួយចាប់តាំងពីពេលនោះមក ត្រូវបានគ្រប់គ្រងដោយមូលនិធិមនុស្សធម៌ហ្កាហ្សាគាំទ្រដោយអ៊ីស្រាអែល និងសហរដ្ឋអាមេរិក ដោយជំនួសប្រព័ន្ធចែកចាយដឹកនាំដោយអង្គការសហប្រជាជាតិដែលមានជាយូរយារណាស់មកហើយ។

ប្រធានគណៈកម្មាធិការអន្តរជាតិនៃកាកបាទក្រហម លោក Mirjana Spoljaric បាននិយាយកាលពីថ្ងៃសុក្រថា «គ្មានលេសសម្រាប់អ្វីដែលកំពុងកើតឡើងនៅតំបន់ហ្កាហ្សាទេ»។