ប្រធានាធិបតីសហរដ្ឋអាមេរិកលោក Donald Trump បានទៅដល់ដែនដីស្កុតឡែនកាលពីថ្ងៃសុក្រ ទី២៥ កក្កដា សម្រាប់ដំណើរទស្សនកិច្ចរយៈពេលប្រាំថ្ងៃ ដែលត្រូវបានកំណត់លាយឡំផ្នែកការទូត ពាណិជ្ជកម្ម និងកម្សាន្ត ខណៈប្រតិបត្តិការសន្តិសុខដ៏ធំរបស់ចក្រភពអង់គ្លេស បានចាប់ផ្តើមភ្លាមៗក្នុងពេលមានការតវ៉ាដែលបានគ្រោងទុកនៅជិតរមណីយដ្ឋានវាយកូនហ្គោលដែលគ្រប់គ្រងដោយគ្រួសាររបស់លោកTrump។

លោកប្រធានាធិបតី ដែលម្តាយរបស់លោកកើតនៅដែនដីស្កុតឡែន នឹងបែងចែកពេលវេលារបស់លោករវាងទីលានវាយកូនហ្គោលនៅមាត់សមុទ្រពីរកន្លែង។ យន្តហោះ Air Force One ដែលដឹកប្រធានាធិបតី និងបុគ្គលិកសេតវិមាន បានចុះនៅអាកាសយានដ្ឋាន Prestwick ក្បែរទីក្រុង Glasgow។ មន្ត្រីនគរបាលបានដាក់ពង្រាយនៅតាមដងផ្លូវ ហើយពលរដ្ឋស្កុតឡេនដែលចង់ដឹងចង់ឃើញជាច្រើនរយនាក់ បានចេញមកក្រៅដោយសង្ឃឹមថានឹងបានឃើញមេដឹកនាំសហរដ្ឋអាមេរិកខណៈលោកបានធ្វើដំណើរទៅកាន់តំបន់ Turnberry ដោយក្បួនរថយន្ត។ លោក Trump ពុំមានព្រឹត្តិការណ៍សាធារណៈគ្រោងទុកសម្រាប់ថ្ងៃសៅរ៍នេះទេ ហើយត្រូវបានគេរំពឹងថានឹងលេងកីឡាវាយកូនហ្គោលនៅឯរមណីយដ្ឋានដ៏ស្រស់ស្អាតរបស់លោក មុនពេលជួបជាមួយប្រធានសហភាពអឺរ៉ុប លោកស្រី Ursula von der Leyen នៅថ្ងៃអាទិត្យសម្រាប់កិច្ចពិភាក្សាពាណិជ្ជកម្ម។ លោក Trump ក៏មានផែនការជួបជាមួយនាយករដ្ឋមន្ត្រីអង់គ្លេស លោក Keir Starmer ក្នុងអំឡុងពេលដំណើរទស្សនកិច្ចនេះផងដែរ។ 

ការតវ៉ាជាអន្តរជាតិជុំវិញជម្លោះនៅតំបន់ហ្កាហ្សាក៏អាចស្ថិតក្នុងរបៀបវារៈផងដែរ ដោយសារតែលោក Starmer ប្រឈមនឹងសម្ពាធកាន់តែខ្លាំងឡើងក្នុងការធ្វើតាមប្រធានាធិបតីបារាំង លោក Emmanuel Macron និងប្រកាសថាចក្រភពអង់គ្លេសនឹងទទួលស្គាល់រដ្ឋប៉ាឡេស្ទីន។