វិទ្យុកងទ័ពអ៊ីស្រាអែល បានដកស្រង់សម្តីមន្ត្រីយោធា ដែលបាននិយាយថា អ៊ីស្រាអែល នឹងអនុញ្ញាតឱ្យប្រទេសបរទេស ទម្លាក់ជំនួយតាមឆ័ត្រយោងចូលទៅក្នុងតំបន់ហ្កាហ្សា។ អ្នកនាំពាក្យយោធាអ៊ីស្រាអែលពុំបានឆ្លើយតបភ្លាមៗចំពោះសំណើរបស់ទីភ្នាក់ងារព័ត៌មាន Reuters ដើម្បីសុំការអត្ថាធិប្បាយលើសេចក្តីរាយការណ៍នេះទេ។

អាជ្ញាធរសុខាភិបាលតំបន់ហ្កាហ្សានិយាយថា មនុស្សជាង១០០នាក់បានស្លាប់ដោយសារការស្រេកឃ្លានក្នុងតំបន់ហ៊ុមព័ទ្ធប៉ាឡេស្ទីនចាប់តាំងពីអ៊ីស្រាអែលបានកាត់ផ្តាច់ការផ្គត់ផ្គង់ដល់ដែនដីនេះក្នុងខែមីនា។ អ៊ីស្រាអែល ដែលបានធ្វើសង្រ្គាមជាមួយក្រុមសកម្មប្រយុទ្ធហាម៉ាសប៉ាឡេស្ទីន នៅតំបន់ហ្កាហ្សា ចាប់តាំងពីខែតុលា ឆ្នាំ២០២៣ បានដកចេញការបិទផ្លូវកាលពីខែឧសភា ប៉ុន្តែមានការរឹតត្បិតដែលខ្លួននិយាយថា ចាំបាច់ដើម្បីការពារជំនួយពីការបង្វែរធ្លាក់ចូលទៅក្នុងដៃរបស់ក្រុមសកម្មប្រយុទ្ធ។

ក្នុងរយៈពេលពីរសប្តាហ៍ដំបូងនៃខែកក្កដា ទីភ្នាក់ងារកុមាររបស់អង្គការសហប្រជាជាតិ UNICEF បានព្យាបាលកុមារចំនួន៥.០០០នាក់ដែលប្រឈមនឹងកង្វះអាហារូបត្ថម្ភធ្ងន់ធ្ងរនៅក្នុងតំបន់ហ្កាហ្សា។ ប្រធានអង្គការសុខភាពពិភពលោក លោក Tedros Adhanom Ghebreyesus បាននិយាយថា តំបន់ហ្កាហ្សាកំពុងទទួលរងនូវភាពអត់ឃ្លានដ៏ធំធេងដែលបង្កើតឡើងដោយមនុស្ស បណ្តាលមកពីការបិទផ្លូវលើការដឹកជញ្ជូនជំនួយចូលទៅក្នុងតំបន់ហ៊ុមព័ទ្ធនោះ។