ទីភ្នាក់ងារការពារជនស៊ីវិលនៅតំបន់ហ្កាហ្សា បាននិយាយថា ប្រតិបត្តិការយោធារបស់អ៊ីស្រាអែល បានសម្លាប់មនុស្សយ៉ាងហោចណាស់ ២៣នាក់ កាលពីថ្ងៃសុក្រ នៅទូទាំងទឹកដីប៉ាឡេស្ទីន ជាមួយនឹងមនុស្ស ៥ នាក់ផ្សេងទៀត បានស្លាប់ នៅក្នុងការវាយប្រហារតាមអាកាសពេញមួយយប់។

អ្នកនាំពាក្យទីភ្នាក់ងារការពារជនស៊ីវិល លោក Mahmud Bassal បានប្រាប់សារព័ត៌មាន AFP ថា មនុស្ស ៥នាក់ ត្រូវបានសម្លាប់ នៅក្នុងការវាយប្រហារលើទីក្រុងហ្កាហ្សា ដែលបានត្រូវចំអគារសិក្សាមួយខ្នង សម្រាប់ជនប៉ាឡេស្ទីនដែលភៀសខ្លួនដោយសង្រ្គាម ដែលឥឡូវនេះ នៅក្នុងខែទី ២២ ហើយ។

លោក Bassal បាននិយាយថា មនុស្ស ៥នាក់ផ្សេងទៀត ត្រូវបានសម្លាប់ នៅពេលដែលការវាយប្រហាររបស់អ៊ីស្រាអែល បានត្រូវចំលើតង់ ដែលប្រើប្រាស់ដោយជនប៉ាឡេស្ទីនដែលបានផ្លាស់ទីលំនៅផងដែរនៅក្នុងទីក្រុងហ្កាហ្សាភាគខាងជើងនៃដែនដីនេះ។

យោធាអ៊ីស្រាអែលបាននិយាយថា ការវាយប្រហារ ត្រូវបានធ្វើឡើង កាលពីល្ងាចថ្ងៃព្រហស្បតិ៍ ដោយកំណត់គោលដៅទៅលើ«ភេរវករដ៏សំខាន់ម្នាក់ នៅក្នុងអង្គការភេរវកម្មជីហាដឥស្លាម» ដែលជាក្រុមសកម្មប្រយុទ្ធមួយ ដែលបានប្រយុទ្ធរួមជាមួយក្រុមហាម៉ាស នៅតំបន់ហ្កាហ្សា។