រដ្ឋមន្ត្រីការបរទេសស៊ីរី បានជួបពិភាក្សាដោយស្មោះត្រង់ និងប្រកបដោយអត្ថប្រយោជន៍ ជាមួយសហរដ្ឋអាមេរិក និងបារាំង ដែលពួកគេបាននិយាយកាលពីថ្ងៃសុក្រថា ពួកគេបានគូសបញ្ជាក់ពីសារៈសំខាន់នៃការធានាជោគជ័យនៃការផ្លាស់ប្តូរនយោបាយ ឯកភាព និងបូរណភាពទឹកដីរបស់ប្រទេសស៊ីរី។

រដ្ឋមន្ត្រីការបរទេសស៊ីរី លោក Asaad Al-Shibani រដ្ឋមន្ត្រីការបរទេសបារាំង លោក Jean Noel Barrot និងបេសកជនពិសេសអាមេរិកទទួលបន្ទុកស៊ីរី លោក Thomas Barrack បានជួបប្រជុំគ្នា នៅទីក្រុងប៉ារីស រយៈពេលប៉ុន្មានថ្ងៃបន្ទាប់ពីបទឈប់បាញ់ បានបញ្ឈប់ការបង្ហូរឈាម នៅក្នុងខេត្ត Sweida ភាគខាងត្បូងនៃប្រទេសស៊ីរី។

មនុស្សរាប់រយនាក់ ត្រូវបានគេរាយការណ៍ថា បានបាត់បង់ជីវិត នៅក្នុងការប៉ះទង្គិចគ្នា រវាងក្រុមយុទ្ធជននៃសហគមន៍ Druze កុលសម្ព័ន្ធBedouinនិកាយស៊ុននី និងកងកម្លាំងរដ្ឋាភិបាល ហើយអ៊ីស្រាអែល បានធ្វើការវាយប្រហារតាមអាកាស ដើម្បីទប់ស្កាត់អ្វីដែលខ្លួនបាននិយាយថា ជាការសម្លាប់រង្គាលនៅសហគមន៍ Druze។

នៅក្នុងសេចក្តីថ្លែងការណ៍រួមមួយ មន្ត្រីស៊ីរី អាមេរិក និងបារាំង បាននិយាយថា ពួកគេបានរៀបចំ «កិច្ចប្រជុំដោយស្មោះត្រង់ និងប្រកបដោយអត្ថប្រយោជន៍ ក្នុងពេលដ៏សំខាន់មួយសម្រាប់ប្រទេសស៊ីរី»។