ភ្នំពេញ ៖ សម្ដេចក្រឡាហោម ស ខេង ប្រធានក្រុមការងារចុះមូលដ្ឋានខេត្តបាត់ដំបង បានផ្ដាំផ្ញើដល់បេក្ខជនក្រុមប្រឹក្សាឃុំ-សង្កាត់ សម្រាប់ការបោះឆ្នោតអាណត្តិថ្មី ត្រូវធ្វើសកម្មភាពល្អៗ ជាមួយប្រជាពលរដ្ឋ ពិសេសចុះទៅតាមខ្នងផ្ទះ ដើម្បីស្វែងយល់ពីជីវភាពពួកគាត់។

ក្នុងពិធីសំណេះសំណាល និងពិសាអាហារសាមគ្គីជាមួយ ក្រុមការងារចុះមូលដ្ឋាន និងមន្ត្រីរាជការក្នុងខេត្តបាត់ដំបង នារាត្រីថ្ងៃទី១០ ខែមករា ឆ្នាំ២០២២ សម្ដេចក្រឡាហោម ស ខេង កោតសរសើរចំពោះក្រុមការងារចុះមូលដ្ឋានខេត្តបាត់ដំបង គ្រប់លំដាប់ថ្នាក់​ បានរួមកម្លាំង​សាមគ្គីគ្នា​ចូលរួមគាំទ្រ​ដល់ការបំពេញភារកិច្ចបំរើជាតិ និងប្រជាពលរដ្ឋខេត្តបាត់ដំបង​ទាំងមូល​ជាពិសេសនៅក្នុងស្ថានភាពប្រឈមបង្កឡើយដោយជំងឺកូវីដ-១៩។

សម្ដេចក្រឡាហោម​ ណែនាំឲ្យថ្នាក់ដឹកនាំ និងមន្រ្តីរាជការ គ្រប់លំដាប់ថ្នាក់ ខិតខំបំពេញភារកិច្ច​ដែល​ថ្នាក់ជាតិ​បានផ្ដល់ជូនមកជាបន្តបន្ទាប់ដើម្បីចូលរួមធ្វើឲ្យសម្រេចបានជោគជ័យ នូវការ​ធ្វើកំណែទម្រង់វិមជ្ឈការ និងវិសហមជ្ឈការ ​ដែលជាកំណែទម្រង់ប្រវត្តិសាស្រ្តនៅកម្ពុជា ធ្វើឲ្យថ្នាក់មូលដ្ឋានកាន់តែមានលទ្ធភាព និងការទទួលខុសត្រូវខ្ពស់ក្នុងការផ្ដល់​សេវា​សាធារណៈជូនប្រជាពលរដ្ឋ។

សម្ដេច បញ្ជាក់ថា បេក្ខជនក្រុមប្រឹក្សា ឃុំ-សង្កាត់ សម្រាប់ការបោះឆ្នោតអាណត្តិថ្មីខាងមុខនេះ ត្រូវ​ខិតខំធ្វើសកម្មភាពល្អៗ ឲ្យបានកាន់តែច្រើនបន្ថែមទៀត​ជាមួយប្រជាពលរដ្ឋពិសេសការ​ចុះទៅ​តាមខ្នងផ្ទះដើម្បីស្វែងយល់ពីជីវភាពនិងដោះស្រាយបញ្ហាជូនពួកគាត់ឱ្យបានទាន់ពេលវេលា។

សម្ដេចក្រឡាហោម​ ក៏បានណែឲ្យបេក្ខជនទាំងអស់ខិតខំពង្រឹងសាមគ្គីភាព និងការផ្ដល់ការគាំទ្រ​ដល់គ្នាទៅវិញទៅមក សម្រាប់ការបំពេញភារកិច្ចបំរើប្រជាពលរដ្ឋនៅមូលដ្ឋាន៕