ប្រធានទីភ្នាក់ងារថាមពលបរមាណូអន្តរជាតិ (IAEA) លោក Rafael Grossi បាននិយាយកាលពីថ្ងៃសុក្រថា លោកត្រូវបាន«លើកទឹកចិត្ត»ដោយអ៊ីរ៉ង់បានយល់ព្រមឲ្យគណៈប្រតិភូមកពីអង្គការឃ្លាំមើលនុយក្លេអ៊ែររបស់អង្គការសហប្រជាជាតិ ធ្វើទស្សនកិច្ចប្រទេសនេះ «ក្នុងរយៈពេលប៉ុន្មានសប្តាហ៍ខាងមុខនេះ។

លោក Grossi បាននិយាយថា ដំណើរទស្សនកិច្ចដោយក្រុមបច្ចេកទេស អាចត្រួសត្រាយផ្លូវសម្រាប់ក្រុមអធិការកិច្ចរបស់អង្គការសហប្រជាជាតិ វិលត្រឡប់ទៅកាន់ប្រទេសអ៊ីរ៉ង់វិញ ដែលអាចមានសក្តានុពល នៅក្នុងឆ្នាំនេះ។

លោក Grossi បានប្រាប់អ្នកយកព័ត៌មានក្នុងអំឡុងពេលបំពេញទស្សនកិច្ចនៅប្រទេសសិង្ហបុរីថា៖ «ប្រសិនបើយើងមិនត្រឡប់មកវិញ ក្នុងពេលឆាប់ៗទេ វានឹងមានបញ្ហាធ្ងន់ធ្ងរ ព្រោះនេះ គឺជាកាតព្វកិច្ចអន្តរជាតិរបស់ប្រទេសអ៊ីរ៉ង់»។

លោកបានបន្ថែមថា៖«ខ្ញុំត្រូវបានលើកទឹកចិត្តដោយអ្វីដែលខ្ញុំបានឮពីទីក្រុង Tehran ក្នុងន័យថា ពួកគេចង់ភ្ជាប់ទំនាក់ទំនងជាមួយយើងឡើងវិញ»។

កាលបរិច្ឆេទសម្រាប់ដំណើរទស្សនកិច្ចនេះ នៅមិនទាន់ត្រូវបានកំណត់នៅឡើយទេ ប៉ុន្តែលោក Grossi បានបញ្ជាក់ថា វានឹងកើតឡើង «ក្នុងរយៈពេលប៉ុន្មានសប្តាហ៍ទៀតនេះ»។