ទូរទស្សន៍រដ្ឋអេហ្ស៊ីប Al Qahera រាយការណ៍នៅថ្ងៃអាទិត្យនេះថា រថយន្តដឹកជំនួយចាប់ផ្តើមធ្វើដំណើរឆ្ពោះទៅកាន់តំបន់ហ្កាហ្សាចេញពីប្រទេសអេហ្ស៊ីប ក្រោយសំពាធអន្តរជាតិអស់រយៈពេលជាច្រើនខែ និងការព្រមានរបស់ទីភ្នាក់ងារជំនួយពីការរីករាលដាលភាពអត់ឃ្លាននៅដែនដីប៉ាឡេស្ទីនមួយនេះ ។

 រូបភាពវីដេអូឃ្លីពីទូរទស្សន៍ Al Qahera ឃើញរថយន្តដឹកជំនួយចតតម្រង់ជួរនៅច្រកឆ្លងកាត់ព្រំដែន មុនពេលចេញដំណើរនៅវេលាម៉ោង ៥ និង ៤២នាទីព្រឹក ម៉ោងក្នុងស្រុក ។

 អ្នកឆ្លងឆ្លើយព័ត៌មានរបស់ទូរទស្សន៍ Al Qahera រាយការណ៍ពីច្រកព្រំដែន Rafah រវាងអេហ្ស៊ីប និងតំបន់ហ្កាហ្សាថា រថយន្តរាប់សិបគ្រឿង ដឹកជំនួយមនុស្សធម៌រាប់ពាន់តោន បានធ្វើដំណើរឆ្ពោះទៅកាន់ច្រកឆ្លងកាត់ Kerem Shalom ស្ថិតនៅតំបន់ហ្កាហ្សា ។ 

អង្គការជំនួយអន្តរជាតិ និយាយថា មាននូវភាពអត់ឃ្លានទ្រង់ទ្រាយធំនៅក្នុងចំណោមពលរដ្ឋហ្កាហ្សា ២,២លាននាក់ ក្នុងនោះស្បៀងអាហារលែងមានសេសសល់ទៀតហើយ ក្រោយអ៊ីស្រាអែលកាត់ផ្តាច់ជំនួយទៅកាន់ដែនដីមួយនេះ កាលពីខែមីនា មុនពេលចាប់ផ្តើមឡើងវិញនៅខែឧសភា ជាមួយនឹងការរឹតត្បិតថ្មី ។

អ៊ីស្រាអែលនិយាយថា ពួកគេបានអនុញ្ញាតឲ្យស្បៀងអាហារគ្រប់គ្រាន់ចូលទៅក្នុងតំបន់ហ្កាហ្សា ហើយពួកគេបានដាក់ការស្តីបន្ទោសលើអង្គការសហប្រជាជាតិ(UN) សម្រាប់ការខកខានការចែកចាយជំនួយនៅតំបន់ហ្កាហ្សា គឺជាអំណះអំណាងមួយត្រូវបានច្រានចោលដោយ UN ក្រុមសិទ្ធិមនុស្ស និងទីភ្នាក់ងារជំនួយផ្សេងទៀត ៕