យោធាអ៊ីស្រាអែល បានសម្លាប់មនុស្សរាប់សិបនាក់នៅតំបន់ហ្កាហ្សា ស្របពេលដែលវិបត្តិអត់ឃ្លាននៅក្នុងដែនដីមួយនេះ កាន់តែធ្ងន់ធ្ងរខ្លាំង ក្នុងនោះជនប៉ាឡេស្ទីន បានស្លាប់ដោយសារកង្វះអាហារូបត្ថម្ភ ។

ប្រភពវេជ្ជសាស្រ្ត បាននិយាយប្រាប់កាសែត Al Jazeera ថា ការវាយប្រហាររបស់អ៊ីស្រាអែល បានសម្លាប់មនុស្ស ៧១នាក់នៅទូទាំងតំបន់ហ្កាហ្សា កាលពីថ្ងៃសៅរ៍ រួមទាំងមនុស្ស ៤២នាក់ ដែលស្វែងរកជំនួយ ។

ក្រសួងសុខាភិបាលហ្កាហ្សា និយាយផងដែរថា មន្ទីរពេទ្យបានរកឃើញមនុស្ស ៥នាក់បន្ថែមទៀតបានស្លាប់ ដោយសារភាពអត់ឃ្លាន បណ្តាលមកពីការបិទច្រករបស់អ៊ីស្រាអែលនៅដែនដីបិទច្រកមួយនេះ ធ្វើឲ្យចំនួនមនុស្សស្លាប់ដោយសារកង្វះអាហារូបត្ថម្ភកើនឡើងដល់ ១២៧នាក់ ចាប់តាំងពីសង្រ្គាមផ្ទុះឡើង ក្នុងនោះរួមទាំងកុមារ ៨៥នាក់ផងដែរ ។

ស្របពេលកើតមានការខឹងសម្បារនៅទូទាំងពិភពលោកជុំវិញវិបត្តិនៅហ្កាហ្សា កាលពីថ្ងៃសៅរ៍ អ៊ីស្រាអែលបានប្រកាសថា ខ្លួននឹងផ្អាកការវាយប្រហារលើតំបន់ស៊ីវិល ហើយនិងបើកច្រករបៀងមនុស្សធម៌ ដើម្បីជំរុញឲ្យមានការចែកចាយជំនួយនៅថ្ងៃអាទិត្យនេះ ។

ទោះបីជាយ៉ាងណាក៏ដោយ ក្រសួងការបរទេសអ៊ីស្រាអែលពុំបានបញ្ជាក់ឲ្យបានច្បាស់លាស់នោះទេ ថាតើកន្លែងណាខ្លះនឹងផ្អាកសង្រ្គាមសម្រាប់បុព្វហេតុមនុស្សធម៌ ។

ពួកគេបានដាក់ការស្តីបន្ទោសជាថ្មីម្តងទៀតលើអង្គការសហប្រជាជាតិ(UN) សម្រាប់ការខកខានការចែកចាយជំនួយនៅតំបន់ហ្កាហ្សា គឺជាអំណះអំណាងមួយត្រូវបានច្រានចោលដោយ UN ក្រុមសិទ្ធិមនុស្ស និងទីភ្នាក់ងារជំនួយផ្សេងទៀត ៕