ភ្លៀងធ្លាក់ខ្លាំងនៅជុំវិញទីក្រុងប៉េកាំង និងទូទាំងតំបន់ភាគខាងជើង និងភាគឦសានប្រទេសចិន បានសម្លាប់មនុស្ស ២នាក់ និងមនុស្សរាប់ពាន់នាក់ផ្សេងទៀត ត្រូវបានជម្លៀសខ្លួន ពេលដែលក្រុមអាជ្ញាធរព្រមានពីភ្លៀងធ្លាក់បន្ថែមទៀត ហើយនិងហានិភ័យគ្រោះមហន្តរាយ រួមទាំងបំណាក់ដី និងទឹកជំនន់ ។

ទូរទស្សន៍រដ្ឋចិន CCTV រាយការណ៍នៅព្រឹកថ្ងៃអាទិត្យថា មនុស្ស ២នាក់ បានស្លាប់ និងមនុស្ស ២នាក់ផ្សេងទៀត កំពុងបាត់ខ្លួននៅខេត្ត Hebei ។

ភ្លៀងធ្លាក់ជាប់កណត់ត្រាកម្ពស់ ១៤៥មីលីម៉ែត្រ ក្នុងរយៈពេល ១ម៉ោង បានកើតមាននៅស្រុក Fuping ស្ថិតក្នុងទីក្រុង Baoding ។

ក្រសួងធនធានទឹកចិន បានចេញការព្រមានទឹកជំនន់នៅតាមបណ្តាលខេត្ត និងតំបន់ចំនួន ១១ រួមទាំងនៅខេត្ត Hebei និងទីក្រុងប៉េកាំងផងដែរ ។

CCTV រាយការណ៍ថា ទឹកជំនន់ និងបំណាក់ដី បានធ្វើឲ្យប៉ះពាល់ដល់ភូមិដ្ឋានប្រជាពលរដ្ឋជាច្រើននៅស្រុក Miyun ក្នុងនោះទីក្រុងជនបទ Fengjiayu រងផលប៉ះពាល់ខ្លាំងជាងគេ ហើយចរន្តអគ្គិសនី និងការទំនាក់ទំនង ត្រូវបានកាត់ផ្តាច់នៅតាមភូមិមួយចំនួន ។

វិទ្យុ Beijing News រាយការណ៍នៅថ្ងៃអាទិត្យនេះថា មនុស្សជាង ៣ពាន់នាក់ ត្រូវបានបញ្ជូនទៅកាន់ទីសុវត្ថិភាព ។

កាលពីថ្ងៃសៅរ៍ ទីក្រុងប៉េកាំង បានចេញការព្រមានពីគ្រោះមហន្តរាយភូមិសាស្រ្ត រួមទាំងបំណាក់ដី ក្រោយភ្លៀងធ្លាក់ខ្លាំងឥតឈប់ឈរ ៕