ក្រុមភ្នាក់ងារពន្លត់អគ្គិភ័យ បានប្រើប្រាស់ឧទ្ធម្ភាគចក្រ និងយន្តហោះ ដើម្បីព្យាយាមពន្លត់ភ្លើងឆេះព្រៃនៅទីក្រុង Kryoneri ស្ថិតនៅចម្ងាយ ២៥គ.ម ភាគខាងជើងទីក្រុងអាតែន ប្រទេសក្រិក ស្របពេលដែលប្រទេសមួយនេះ ស្ថិតក្រោមរលកកម្តៅ ។ 

ភ្លើងឆេះព្រៃចាប់ផ្តើមដំបូងនៅភូមិ Drosopigi និងបានបំផ្លិចបំផ្លាញផ្ទះសម្បែងប្រជាពលរដ្ឋជាច្រើនខ្នង ។ ប្រជាពលរដ្ឋរស់នៅភូមិ Kryoneri ត្រូវបានក្រុមអាជ្ញាធរណែនាំឲ្យជម្លៀសខ្លួនទៅកាន់ទីក្រុងអាតែន ។

យោងតាមព័ត៌មានទទួលបានពីសេវាកម្មគិលានសង្រ្គោះក្រិក បានឲ្យដឹងថា មនុស្ស ៥នាក់ ត្រូវបានបញ្ជូនទៅកាន់មន្ទីរពេទ្យ ។

ឧទ្ធម្ភាគចក្របានទម្លាក់ទឹកលើតំបន់រងការឆាបឆេះ ជាទីដែលសម្បូរដោយរោងចក្រ ហើយក្រុមភ្នាក់ងារពន្លត់អគ្គិភ័យ ១៤៥នាក់ បានព្យាយាមពន្លត់អណ្តាតភ្លើង ដោយប្រើប្រាស់រថយន្តពន្លត់អគ្គិភ័យ ៤៤គ្រឿង ឧទ្ធម្ភាគចក្រ ៧គ្រឿង និងយន្តហោះ ១០គ្រឿង ។

សេវាកម្មឧតុនិយមក្រិក រាយការណ៍ថា សីតុណ្ហភាពនៅក្នុងប្រទេសក្រិក បានកើនឡើងដល់ ៤៤អង្សាសេកាលពីថ្ងៃសៅរ៍ ។

សូមបញ្ជាក់ថា ប្រទេសក្រិក និងប្រទេសជាច្រើនទៀតក្នុងតំបន់មេឌីទែរ៉ាណា ស្ថិតក្រោមរលកកម្តៅដែលក្រុមអ្នកវិទ្យាសាស្រ្តដាក់ការស្តីបន្ទោសលើបម្រែបម្រួលអាកាសធាតុ ៕