កម្ពុជា និងថៃ បាននិយាយថា ពួកគេបើកទូលាយចំពោះកិច្ចប្រជុំការឈប់បាញ់ បន្ទាប់ពីការអន្តរាគមន៍កាលពីយប់កន្លងទៅពីប្រធានាធិបតីសហរដ្ឋអាមេរិកលោក Donald Trump ។

 សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និយាយថា រដ្ឋមន្រ្តីការបរទេសរបស់លោក នឹងជជែកគ្នាជាមួយរដ្ឋមន្រ្តីការបរទេសសហរដ្ឋអាមេរិកលោក Marco Rubio ដើម្បីសម្របសម្រួលជាមួយភាគីថៃ ប៉ុន្តែសម្តេចបានព្រមានទីក្រងបាងកក ប្រឆាំងនឹងកិច្ចព្រមព្រៀងណាមួយ ។

 ខណៈពេលនោះដែរ ថៃ និយាយកាលពីយប់ថ្ងៃសៅរ៍ថា ខ្លួនយល់ព្រមនឹងគោលការណ៍ចូលរួមការឈប់បាញ់ជាមួយកម្ពុជា និងចាប់ផ្តើមកិច្ចសន្ទនាទ្វេភាគី ដែលមានបំណងបញ្ចប់ការប្រយុទ្ធគ្នាស្លាប់មនុស្សច្រើនបំផុតនៅក្នុងរយៈពេលជាង ១ទសវត្សរ៍កន្លងមកនេះ ។ ប្រទេសជិតខាងអាស៊ីអាគ្នេយ៍ទាំង ២ បានផ្លោងគ្រាប់កាំភ្លើងធំដាក់គ្នាទៅវិញទៅមកអស់រយៈពេល ៣ថ្ងៃជាប់ៗគ្នា កាលពីថ្ងៃសៅរ៍ ស្របពេលដែលជម្លោះព្រំដែននេះ បណ្តាលឲ្យមនុស្សជាង ១៥ម៉ឺននាក់ ជម្លៀសចេញពីផ្ទះសម្បែងរបស់ពួកគេ នៅតាមតំបន់ព្រំដែន ។

ក្រសួងការបរទេសថៃ និយាយនៅលើបណ្តាញព័ត៌មានសង្គម Xថា ថៃយល់ស្របគោលការណ៍មានការឈប់បាញ់ ។ ការលើកឡើងបែបនេះ បានកើតឡើង បន្ទាប់ពីមានការបង្ហោះសាររបស់លោក Trumpនៅលើបណ្តាញព័ត៌មានសង្គម Truth Social ដែលលោកបាននិយាយថា លោកបាននិយាយជាមួយនាយករដ្ឋមន្រ្តីកម្ពុជា សម្តេចមហាបវរធិបតី ហ៊ុន ម៉ាណែត និងនាយករដ្ឋមន្រ្តីស្តីទីថៃលោក Phumtham Wechayachai ហើយភាគីទាំង ២បានយល់ព្រមជួបគ្នា និងដោះស្រាយភ្លាមៗការឈប់បាញ់ ។

 ក្រសួងការបរទេសថៃបានបញ្ជាក់ពីការជជែកគ្នាតាមទូរស័ព្ទរវាងលោក Trump និងលោក Phumtham ហើយនិងបានធ្វើការសង្កត់ធ្ងន់ថា ពាក់ព័ន្ធនឹងបទឈប់បាញ់ដែលអាចកើតមាន ថៃចង់មើលឃើញចេតនាស្មោះត្រង់ពីភាគីកម្ពុជា ។ ពួកគេនិយាយថា លោក Phumtham បានស្នើសុំលោក Trump នាំពាក្យដល់ភាគីកម្ពុជាថា ថៃ ចង់ឲ្យមានកិច្ចសន្ទនាទ្វេភាគីឲ្យបានឆាប់រហ័សតាមដែលអាចធ្វើទៅបាន ដើម្បីបង្កើតវិធានការ និងនីតិវិធី សម្រាប់ការឈប់បាញ់ ហើយនិងដំណោះស្រាយសន្តិភាពចុងក្រោយនៃជម្លោះមួយនេះ ។

 អ្នកសារព័ត៌មាន AFP និងក្រសួងការពារជាតិកម្ពុជា និយាយថា ថៃ និងកម្ពុជា បានផ្លោងគ្រាប់កាំភ្លើងធំដាក់គ្នាទៅវិញទៅមកសម្រាប់រយៈពេល ៤ថ្ងៃជាប់ៗគ្នា នាថ្ងៃអាទិត្យនេះ បើទោះបីជាមានកិច្ចពិភាក្សាកើនឡើងពីលទ្ធភាពនៃការឈប់បាញ់ក៏ដោយ ៕