យោធាអ៊ីស្រាអែល និយាយថា ថ្មីៗនេះ ខ្លួនបានទម្លាក់ជំនួយមនុស្សធម៌ពីលើអាកាសចូលទៅកាន់តំបន់ហ្កាហ្សាស្រ្ទីប បន្ទាប់ពីសម្ពាធអន្តរជាតិអស់រយៈពេលជាច្រើនសប្តាហ៍ ហើយនិងការកើនឡើងវិបត្តិអត់ឃ្លាននៅដែនដីប៉ាឡេស្ទីនមួយនេះ ។

ក្នុងសេចក្តីថ្លែងការណ៍នៅព្រឹកថ្ងៃអាទិត្យនេះ កងកម្លាំងការពារជាតិអ៊ីស្រាអែល(IDF) និយាយថា ការទម្លាក់ជំនួយតាមអាកាស រួមមានម៉្សៅ ស្ក និងអាហារកំប៉ុង ។

អ៊ីស្រាអែលនិយាយមុននេះថា ពួកគេត្រៀមខ្លួនរួចរាល់ក្នុងការបើកច្រករបៀងមនុស្សធម៌ ដើម្បីអនុញ្ញាតឲ្យក្បួនរថយន្តអង្គការសហប្រជាជាតិ(UN)ចូលទៅក្នុងតំបន់ហ្កាហ្សា ។

ការលើកឡើងបែបនេះ បានកើតមានឡើង ស្របពេលមានការអំពាវនាវឲ្យអ៊ីស្រាអែលអនុញ្ញាតជំនួយបន្ថែមទៀតចូលទៅក្នុងតំបន់ហ្កាហ្សា ក្រោយការព្រមានពីភាពអត់ឃ្លានទ្រង់ទ្រាយធំ បន្ទាប់ពីការផ្គត់ផ្គង់មានដែនកំណត់អស់រយៈពេលជាច្រើនខែចូលទៅកាន់តំបន់មានពលរដ្ឋរស់នៅជាង ២លាននេះ បានធ្វើឡើងដោយមានការសម្របសម្រួលជាមួយ UN និងដឹកនាំដោយយោធាអ៊ីស្រាអែល ដែលគ្រប់គ្រងជំនួយចូលទៅក្នុងតំបន់ហ្កាហ្សា ។

យោធាបានបង្ហោះផងដែរវីដេអូ ឃើញយន្តហោះទម្លាក់ជំនួយពីលើអាកាស ប៉ុន្តែរូបភាពវីដេអូឃ្លីបនេះ ពុំត្រូវបានបញ្ជាក់ផ្ទៀងផ្ទាត់ដោយឯករាជ្យនោះទេ ៕