យោធាអ៊ីស្រាអែល បានប្រកាសនៅថ្ងៃអាទិត្យ (២៧ កក្កដា) នេះពីការផ្អាកសកម្មភាពយោធាក្នុងតំបន់ដែលបានកំណត់ចំនួន ៣ទីតាំងនៃដែនដីហ្កាហ្សា ភ្លាមៗបន្ទាប់ពីនិយាយថា ខ្លួនកំពុងចាត់វិធានការជាច្រើនដើម្បីបន្ធូរបន្ថយវិបត្តិមនុស្សធម៌ដ៏ធ្ងន់ធ្ងរនៅក្នុងតំបន់ប៉ាឡេស្ទីនមួយនេះ។

យោធានិយាយថា ការផ្អាកសកម្មភាពយោធានេះនឹងធ្វើឡើងរៀងរាល់ថ្ងៃនៅតំបន់ក្រុង Al-Mawasi, Deir al-Balah, និង Gaza City ចាប់ពីម៉ោង ១០ព្រឹក (ម៉ោងក្នុងស្រុក) ដល់ម៉ោង ៨យប់ ចាប់ពីថ្ងៃអាទិត្យនេះតទៅ រហូតដល់ការជូនដំណឹងបន្ថែម។ អ៊ីស្រាអែលបន្ថែមថា ផ្លូវសុវត្ថិភាពដែលបានកំណត់ ក៏នឹងដាក់ដំណើរការជាអចិន្ត្រៃយ៍ចាប់ពីម៉ោងក្នុងស្រុក ៦ព្រឹក រហូតដល់ម៉ោង ១១យប់ផងដែរ។

យោធាអ៊ីស្រាអែលនិយាយទៀតថា ខ្លួនមិនបានប្រតិបត្តិការក្នុងតំបន់ទាំងនោះទេ ប៉ុន្តែមានការប្រយុទ្ធគ្នា និងការវាយប្រហារក្នុងប៉ុន្មានសប្តាហ៍ថ្មីៗនេះ។ សេចក្ដីប្រកាសផ្អាកប្រយុទ្ធមួយចំនួននេះបានកើតមានឡើង បន្ទាប់ពីការព្រមានរបស់អ្នកជំនាញជាច្រើនខែអំពីគ្រោះទុរ្ភិក្សនៅហ្កាហ្សា ស្របពេលមានការរឹតត្បិតរបស់អ៊ីស្រាអែល លើជំនួយ។

នៅមុននោះ យោធាអ៊ីស្រាអែលប្រកាសថាខ្លួនបាន "អនុវត្តការទម្លាក់ជំនួយមនុស្សធម៌ពីលើអាកាស ជាផ្នែកនៃកិច្ចខិតខំប្រឹងប្រែងកំពុងបន្តដើម្បីអនុញ្ញាត និងសម្រួលដល់ការបញ្ចូលជំនួយទៅកាន់តំបន់ហ្កាហ្សាស្ទ្រីប"។ អ៊ីស្រាអែលបន្ថែមថា ជំហានមនុស្សធម៌ទាំងនេះត្រូវបានអនុញ្ញាត រួមជាមួយនឹងការវាយលុករបស់ខ្លួនប្រឆាំងនឹងក្រុមហាម៉ាស និងក្រុមសកម្មប្រយុទ្ធផ្សេងទៀតនៅក្នុងតំបន់ហ្កាហ្សា៕