មនុស្សរាប់ពាន់នាក់នៅក្នុងប្រទេសក្រិក និងទួរគីត្រូវបានបង្ខំឱ្យជម្លៀសចេញពីផ្ទះសម្បែង ខណៈ ក្រុមពន្លត់អគ្គិភ័យក្នុងប្រទេសកំពុងទប់ស្កាត់ភ្លើងឆេះព្រៃដែលបណ្តាលមកពីខ្យល់បក់ខ្លាំង និងការកើនឡើងកម្ដៅ។

ស្របពេលសីតុណ្ហភាពនៅអឺរ៉ុបភាគអាគ្នេយ៍កើនលើស ៤០អង្សាសេ ក្នុងរយៈពេលប្រាំពីរថ្ងៃជាប់គ្នា នាយករដ្ឋមន្ត្រីក្រិកបានសរសើរក្រុមអ្នកជួយសង្គ្រោះដែលព្យាយាមពន្លត់អណ្ដាតភ្លើង។

លោក Kyriakos Mitsotakis បាននិយាយក្នុងសេចក្តីថ្លែងការណ៍មួយថា យន្តការរដ្ឋត្រូវបានអំពាវនាវឱ្យចូលរួមពន្លត់ភ្លើងឆេះព្រៃ ក្នុងពេលដំណាលគ្នាឆ្លើយតបទៅនឹងភ្លើងឆេះព្រៃរាប់សិបកន្លែងនៅទូទាំងប្រទេស ។ 

តំបន់ចំនួន ១១ របស់ប្រទេសក្រិកប្រឈមនឹងហានិភ័យខ្ពស់នៃចំហេះព្រៃ ហើយរដ្ឋាភិបាលបានអំពាវនាវរកជំនួយពីដៃគូសហភាពអឺរ៉ុប ដើម្បីជួយដោះស្រាយចំហេះព្រៃ ដែលកំពុងឆេះនៅផ្នែកជាច្រើន។

ក្នុងប្រទេសទួរគី ជាទីដែលសីតុណ្ហភាពហក់ឡើងខ្ពស់បំផុត ៥០,៥ អង្សាសេ ត្រូវបានកត់ត្រានៅក្នុងខេត្ត Şirnak នៅភាគអាគ្នេយ៍ លើសពីកំណត់ត្រាកម្ដៅកាលពីកន្លងទៅ ៤៩,៥អង្សាសេ ក្នុងខែសីហា ឆ្នាំ ២០២៣  មនុស្សជាង ១.៧០០នាក់ ត្រូវបានបង្ខំឱ្យភៀសខ្លួនចេញពីផ្ទះរបស់ពួកគេ បន្ទាប់ពីភ្លើងឆេះព្រៃបានឆាបឆេះខ្លាំងរាលដាលទៅដល់ទីក្រុង Bursa ដែលជាទីក្រុងធំបំផុតទីបួនរបស់ប្រទេសទរគី៕