ក្រុមអាជ្ញាធរនិយាយថា ភ្លៀងធ្លាក់ខ្លាំងនៅជុំវិញទីក្រុងប៉េកាំង និងខេត្តក្បែរៗនោះនៅភាគខាងជើងប្រទេសចិន នាថ្ងៃចន្ទ (២៨ កក្កដា) នេះ កំពុងតែបន្តកើតមានយ៉ាងខ្លាំងក្លា ដោយបង្កើនហានិភ័យនៃគ្រោះមហន្តរាយជាច្រើនរួមទាំងបំណាក់ដី និងទឹកជំនន់យ៉ាងគំហុក ខណៈមនុស្សជាង ៤.០០០នាក់ ត្រូវបានជម្លៀសចេញពីគ្រោះថ្នាក់ទៅកាន់ទីទួលសុវត្ថិភាព។

ទូរទស្សន៍រដ្ឋ CCTV រាយការណ៍ថា ភ្លៀងធ្លាក់ខ្លាំងបន្តវាយប្រហារតំបន់ជាយក្រុងភាគពាយព្យ Miyun ក្នុងទីក្រុងប៉េកាំង បណ្តាលឱ្យមានទឹកជំនន់ និងបំណាក់ដី ហើយភូមិជាច្រើនត្រូវបានរងផលប៉ះពាល់។

ភាគខាងជើងប្រទេសចិន បានជួបប្រទះនូវជំនន់ទឹកភ្លៀងក្នុងប៉ុន្មានឆ្នាំថ្មីៗនេះ ដោយបានបង្ហាញថា ទីក្រុងដែលមានប្រជាជនច្រើន រួមទាំងទីក្រុងប៉េកាំងផងដែរ ងាយរងគ្រោះទៅនឹងហានិភ័យទឹកជំនន់។ អ្នកវិទ្យាសាស្ត្រមួយចំនួនបានផ្សារភ្ជាប់កំណើនភ្លៀងធ្លាក់នៅភាគខាងជើងដែលស្ងួតហួតហែងរបស់ប្រទេសចិននេះ ទៅនឹងការឡើងកម្ដៅផែនដី។

ក្រសួងធនធានទឹកចិន ចេញការព្រមានពីទឹកជំនន់ទៅកាន់ខេត្ត និងតំបន់ចំនួន១១ រួមទាំងទីក្រុងប៉េកាំង និងខេត្ត ហឺប៉ី (Hebei) ដែលនៅជិតខាង សម្រាប់ទឹកជំនន់យ៉ាងគំហុកពីទន្លេ និងតំបន់ជម្រាលភ្នំ។ ព្យុះភ្លៀងនេះគឺជាផ្នែកមួយនៃគំរូទូលំទូលាយនៃអាកាសធាតុធ្ងន់ធ្ងរនៅទូទាំងប្រទេសចិន ដោយសារតែខ្យល់មូសុងនៅអាស៊ីបូព៌ា ដែលបានបង្កការរំខានដល់សេដ្ឋកិច្ចធំទីពីររបស់ពិភពលោក៕